«Հաջողություն ասելով ի՞նչ նկատի ունեք»․ վարչապետը ճեպազրույց տվեց

armtimes.com / «ՀՀԿ-ի օֆիցիալ կարծիքը երբ որ լինի հարց տվեք: Դուք կուսակցության օֆիցիալ կարծիքը լսե՞լ եք՝ ոչ: Երբ որ լինի, այն ժամանակ կխոսենք: Դա իրենց մասնավոր կարծիքն է, կուսակցությունը դեռ որոշում չունի»,- այս մասին լրագրողների հետ ճեպազրույցի ժամանակ ասաց ՀՀ վարչապետ Կարեն Կարապետյանը՝ պատասխանելով հարցին, թե արդյո՞ք որոշվել է 2018 թվականին վարչապետի հարցը, քանի որ հնչում են տեսակետներ, որ Սերժ Սարգսյանն է լինելու վարչապետը: «Կուսակցությունը հենց որոշում ունենա, կհայտարարենք»,- ասաց Կարեն Կարապետյանը:

Անդրադառնալով Հայաստան-սփյուռք համաժողովի ժամանակ Արամ Առաջինի ելույթին, որ արտագաղթը Հայաստանից ահագնանում է, վարչապետն ասաց. «Նախ եւ առաջ ես ուզում եմ ասել, որ միգրացիոն պրոցեսներ բոլոր երկրներում կան եւ այնպիսի իրավիճակ չի լինի՝ անկախ նրանից, թե մեր կյանքը որակապես ինչքան կլանավան, միգրացիո պրոցեսները կկանգնեն: Ելքի, մուտքի դրական հարաբերակցությունները կփոխվի, այդ իսկ պատճառով ի՞նչ պետք է անենք, այնպես անենք, որպեսզի Հայաստանը դառնա ապահով, զարգացող երկիր»:

Դիտարկմանը, որ քաղաքացիներն իրենց մաշկի վրա չեն զգում տնտեսությունում կատարված փոփոխությունները, որի համար էլ արտագաղթում են, Կարեն Կարապետյանը հակադարձեց. «Ձեր մաշկը մի զգացողություն ունի, մեկ ուրիշի մաշկը ուրիշ, ո՞նց ենք տարբերելու»: Վարչապետի խոսքով, կառավարության ցուցանիշները, որոնք այժմ ամփովում են առաջատարն են ԵԱՏՄ երկրների շարքում, որը բավարար չի քաղաքացիների բոլոր խնդիրները լուծել:

«Մենք իրականում ունե՞նք աճ, բավարարվա՞ծ ենք այս աճով, թե՞ չէ, այսօր խնդիրներ ունենք, որի մասին խոսում ենք, ես նույնիսկ չգիտեմ՝ այս հարցը որ տալիս եք ձեր կյանքն ինչո՞վ է լավացնելու կամ վատացնելու: Ի՞նչն է փոխվելու ձեր կյանքի մեջ էլի»,- ակնհայտ դժգոհեց վարչապետը:

Լրագրողները նրան հիշեցրեցին սփյուռքահայ որոշ գործիչների այն հայտարարությունները, որոնք մի քանի անգամ փորձել են բիզնես հիմնել Հայաստանում, սակայն խնդիրներ են ունեցել: «Ես չգիտեմ, եթե ինքը տա մեզ փաստեր, շատ հետեւողական այդ ուղղությամբ գնալու ենք, որովհետեւ մենք չենք կարողանալու տնտեսությունը զարգացնենք եթե սեփականության նկատմամբ վստահություն չլինի, բիզնես կանոնների նկատմամբ վստահություն չլինի, հավասար խաղի կանոների նկատմամբ վստահություն չլինի, հարկային, մաքսային եւ այլն: Այդ իսկ պատճառով ես շատ բաց եմ»,- ասաց Կարեն Կարապետյանն ու նշեց, որ իր օգնականների եւ խորհրդականների կոնտակտային տվյալները հրապարակված են եւ նման ցանկացած դեպք կարող են ներկայացնել նրանց: