Խիստ լարված իրավիճակ․ Նոր Կյանքում են ԱԺ պատգամավորներ

armtimes.com-ը տեղեկացնում է․

18.00 Հավաքը մեկնարկել է Մշակույթի տան հարակից տարածքում, ոչ այն վայրում, որտեղ ի սկզբանե ցանկանում էին ակցիա անել: Մինչ հավաքի մեկնարկը գործող գյուղապետը դուրս եկավ Մշակույթի տան շենքից եւ բակում հավաքված քաղաքացիներից պահանջեց, որպեսզի մտնեն շենքի ներս՝ բղավելով՝ դավայ, ներս անցեք, հատ-հատ պետք ա ասե՞մ, ներս անցեք:

Հավաքը այս պահին ընթանում է բնականոն հունով: Կարճ ելույթներ ունեցան ԱԺ պատգամավոր Նիկոլ Փաշինյանը եւ Սասուն Միքայելյանը: Իսկ այժմ էլ Գարիկ Սարգսյանն է խոսում: Վերջինս կոչ է անում գնալ եւ ընտրությանը քվեարկել «Քաղաքացիական պայմանագրի» թեկնածուների օգտին:

17.10 Արարատի մարզի Նոր Կյանք գյուղում դեռ չի մեկնարկել «Քաղաքացիական պայմանագիր» կուսակցության անդամ, Նոր Կյանք համայնքի ղեկավարի թեկնածու Գարիկ Սարգսյանի նախընտրական հանրահավաքը, որը նախատեսված էր այսօր ժամը 17:00-ին: Հավաքի վայրում՝ Նոր Կյանքի մշակույթի տան բակում, բազմաթիվ մեքենաներ են կայանված, իսկ մեքենաների անձնակազմը մշակույթի տան ներսում մասնակցում է տոնական համերգի:

Գարիկ Սարգսյանի շտաբի անդամները բանակցում էին ոստիկանների հետ, որպեսզի հնարավորություն ունենան գոնե մշակույթի տան հարակից տարածքում հավաք անցկացնել: Սակայն, ոստիկանները թույլ չտվեցին՝ ասելով, որ կխանգարեն ներսում ընթացող միջոցառմանը եւ առաջարկեցին 20:00-ից հետո միայն տվյալ վայրում հավաք անցկացնել:

Գարիկ Սարգսյանի թիմակիցները ստիպված որոշեցին հավաք անցկացնել մշակույթի տնից մոտ 100 մետր հեռավորության վրա գտնվող ամայի տարածքում:

Այս պահին տարածքում են նաեւ «Քաղաքացիական պայմանագիր» կուսակցության վարչության անդամներ Սասուն Միքայելյանն ու ԱԺ պատգամավոր Նիկոլ Փաշինյանը: Վերջինս քիչ առաջ դուրս եկավ մշակույթի տնից, որտեղ մոտ 5 րոպե համերգ էր նայում, թերեւս հասկանալու, թե այդ ինչ միջոցառում է ներսում կազմակերպված:

Հիշեցնենք, այս կիրակի Նոր Կյանքում սպասվող համայնքի ղեկավարի ընտրություններում իրար դեմ պայքարում են գործող ՀՀԿ-ական գյուղապետ Մայիս Աբրահամյանը եւ ՔՊ անդամ Գարիկ Սարգսյանը: ՔՊ-ն արդեն մի քանի օր է, փորձում է գյուղի մշակույթի տանը նախընտրական հավաք անցկացնելու թույլտվություն ստանալ: Գյուղապետը, սակայն տարբեր պատրվակներով դա թույլ չի տալիս:

Մեր թղթակիցը Նոր Կյանքից փոխանցում է, որ այս պահին գյուղի մշակույթի տան հարակից տարածքում կան բազմաթիվ ոստիկաններ, քիչ առաջ էլ հրապարակ ժամանեց Արարատի մարզի ոստիկանապետը, ասաց, որ բաց տարածքից էլ դուրս գան, քանի որ գյուղապետը պնդել է, որ դա իր սեփական տարածքն է:

Մեր թղթակիցը տեսանկարահանելիս է եղել այս ամենը, երբ հավաքված քաղաքացիներից մեկը, նախ, պահանջել է, որպեսզի տեսանկարահանում չիրականացվի, այնուհետեւ հարվածել է մեր թղթակցի ձեռքին: Վերջինս կողքին գտնվող ոստիկանապետին ու երեք ոստիկաններին հարցրել է՝ տեսաք՞: Նրանք բոլորը միասին հայտարարել են՝ ոչ, մենք որեւէ բան չենք տեսել:

Նոր կյանքում իրավիճակը շարունակում է խիստ լարված մնալ: Գործող գյուղապետի համակիրներն ուշի ուշով հետեւում են Գարիկ Սարգսյանի թիմակիցների տեղաշարժին:

Այս պահին տարածք է ժամանել ԱԺ ՀՀԿ խմբակցության պատգամավոր Արայիկ Գրիգորյանը՝ Ավշարի Արայիկը: