Հովիկ Աբրահամյանի թիմը հեռանում է

«Հրապարակ»-ը գրում է․

Հովիկ Աբրահամյանի հեռանալուն զուգահեռ կառավարությունից հեռանում է նաեւ նրա թիմը: Վարչապետի հրաժարականի օրը աշխատանքից ազատման դիմում գրեց նրա խոսնակը` Գոհար Պողոսյանը, որը երկար տարիներ աշխատում էր ԱԺ-ում եւ գործադիր էր տեղափոխվել Աբրահամյանի նշանակվելուց հետո:
Մեր տեղեկություններով` աշխատանքից ազատման դիմումներ կգրեն նաեւ Աբրահամյանի հետ կառավարություն եկած մի շարք օգնականներ եւ խորհրդականներ: Օրինակ` հեռացողների մեջ կլինեն օգնականներ Վահան Դիլանյանը, Աննա Գեւորգյանը: Օգնական Աննա Գեւորգյանն աշխատել է մի շարք միջազգային կազմակերպություններում, ԱԺ-ում, վարչապետի օգնական է դարձել 2014թ.: Իսկ Վահան Դիլանյանը եղել է Հայաստանի ազգային մրցունակության հիմնադրամում հանրային կապերի պատասխանատու, ԼՂՀ արտաքին գործերի նախարարի խորհրդական, 2015թ.-ից վարչապետի օգնականն է:
Ամենայն հավանականությամբ, կհեռանա նաեւ գլխավոր խորհրդական Գագիկ Արզումանյանը, խորհրդականներ Կորյուն Հակոբյանը, Արման Խաչատրյանը, Կովալենկո Շահգալդյանը, Գագիկ Խաչատրյանը: Գագիկ Արզումանյանը հանքարդյունաբերության ոլորտի մասնագետ է, «Վալեքս գրուպի» նախկին փոխնախագահ, «ԷյՍիՓի» ընկերության նախկին տնօրեն։ Նա խորհրդական էր նշանակվել 2016թ. հունիսի 7-ին եւ, ասում են, հայաստանյան չափանիշներով ֆանտաստիկ վարձատրության դիմաց է համաձայնել գալ այս պաշտոնին։ Վերջերս մեզ հետ զրույցում էլ հայտարարել էր, թե Թեղուտն իր համար անցյալ է, կառավարությունը` ներկա: Շուտով, հավանաբար, կառավարության մասին էլ կասի՝ այն այլեւս անցյալ է:
Կորյուն Հակոբյանը սփյուռքի նախարար Հրանուշ Հակոբյանի եղբայրն է, հենց նա էր խնդրել, որ եղբորը մի «թեթեւ» գործ տան, իսկ մինչ այդ վերջինս աշխատել է կառավարությունում, տարբեր ընկերություններում` զբաղեցնելով տարբեր պաշտոններ: Արման Խաչատրյանը եղել է Հայաստանի զարգացման հիմնադրամի գործադիր տնօրենը, վարչապետի խորհրդական է նշանակվել 2016 թ. ապրիլի 21-ից: Կովալենկո Շահգալդյանը Կոտայքի երկարամյա մարզպետն էր, պաշտոնից ազատվելուց հետո 2014թ. մայիսի 29-ին նշանակվեց ՀՀ վարչապետի խորհրդական:
Գագիկ Խաչատրյանը խորհրդական էր աշխատում հասարակական հիմունքներով, այսինքն` չէր վարձատրվում, իսկ մինչ այդ եղել է Ջրային կոմիտեում նախագահի տեղակալ, անցյալում էլ եղել է քաղաքաշինության նախարարի տեղակալ: Փաստորեն`գրեթե բոլոր թվարկվածները ժամանակին ինչ-որ պաշտոն են զբաղեցրել եւ աշխատանքից ազատվելուց հետո հայտնվել են խորհրդականի պաշտոնում։ Դե, մի բան պիտի տային, որ չնեղանային: Պարզ չէ, թե այսուհետ ինչով են զբաղվելու նրանք։