Եվրամիությունը բազմամիլիոնանոց երկու ներդրում կկատարի Հայաստանում

Եվրոպական միությունը պատրաստվում է Հայաստանի կրթական ոլորտում բազմամիլիոն արժողությամբ 2 ներդրում կատարել: Այս մասին այսօր «Հիլթն» հյուրանոցում «էրազմուս +» ծրագրի շրջանակներում կազմակերպված մամուլի ասուլիսի ժամանակ ասաց Հայաստանում ԵՄ պատվիրակության ղեկավար, դեսպան Պյոտոր Սվիտալսկին՝ խոսելով Հայաստանի կրթության ոլորտին ԵՄ-ի ցուցաբերվելիք աջակցության մասին:

«Մենք որպես ԵՄ, որոշել ենք խորհրդատվության եւ կառավարության հետ համագործակցության արդյունքում մեծապես լուրջ ներդրումներ կատարել կրթական ոլորտում: Ես հիմա չեմ կարող հայտարարել կոնկրետ այն ծրագրերը, որոնք նախատեսված են, բայց ես կարող եմ ասել, որ բավականին աշխատանք ենք կատարել եւ շուտով կկարողանանք բաց եւ հրապարակավ խոսել այս մասին: Մենք ունենք բազմամիլիոնանոց 2 մեծ ծրագիր, որոնք մենք ցանկանում ենք իրականացնել Հայաստանում»,- ասաց Պյոտոր Սվիտալսկին՝ նշելով, որ կարծում է, թե դա կլինի ընդամենը սկիզբը:

Վերջինս կարծում է նաեւ, որ համագործակցությունը Հայաստանի կրթական հատվածի հետ շատ կարեւոր է, որովհետեւ երիտասարդների բարձր մակարդակը, մղումը կրթություն ստանալու շատ կարեւոր է:

Armtimes.com-ը դեսպանից հետաքրքրվեց, թե արդյո՞ք այդ ներդրումների համար խոչընդոտ չի հանդիսանա Հայաստանի կրթական ոլորտում առկա կոռուպցիան, եւ արդյո՞ք այդ ներդրումային ծրագիրը ԵՄ-ի դրամաշնորհների աղմկոտ գործի հեռանկարը չի ունենա: «Իհարկե, ես տեղյակ եմ, եւ գիտակցում եմ բոլոր հնարավոր ռիսկերը, բայց մենք աշխատում ենք դրական սցենարների հետ եւ ես հուսով եմ, որ մենք կկարողանանք նվազագույնի հասցնել ռիսկերը: Հուսով եմ, որ բոլոր նոր զարգացումները, վերջերս մշակված օրենսդրությունը, որը վերաբերվում է կոռուպցիայի դեմ պայքարին, նոր հաստատության ստեղծումը, ինչպես նաեւ այլ միջոցառումները, որոնց մենք աջակցում ենք, կօգնեն մեզ նվազագույնի հասցնել ռիսկերը»,- պատասխանեց դեսպանը:

Պյոտոր Սվիտալսկին նշեց նաեւ, որ կոռուպցիայի ռիսկերով Հայաստանը միակը չէ եւ առաջարկեց ծանոթանալ բազմաթիվ այլ երկրների հետ, որտեղ կոռուպցիոն ռիսկերն առկա են հենց կրթության ոլորտում: «Բայց մենք պատշաճ ուշադրություն ենք դարձնում այդ խնդիրներին: Դուք գիտեք ինձ, գիտեք՝ ինչքան ժամանակ եմ ես նվիրում իմ գործողություններում աջակցելու կոռուպցիայի դեմ ձեր պայքարին, եւ ես հավատում եմ, որ կրթությունն այն ոլորտն է, որտեղ կոռուպցիան պետք է արմատախիլ արվի»,- հայտարարեց Պյոտոր Սվիտալսկին:

Հայաստանում ԵՄ պատվիրակության ղեկավարը վստահեցրեց, որ ԵՄ-ն պատրաստ է աջակցել Հայաստանին կրթության ոլորտում առկա կոռուպցիայի վերացման ծրագրերին:

«Առնվազն մեր ծրագրերը եւ մեր գործողությունները, այս ռիսկը հաշվի կառնեն եւ մենք մեծապես հույս ունենք, որ մեր ներդրման եւ մասնակցության միջոցով կօգնենք պայքարել կոռուպցիայի դեմ կրթական համակարգում»,- շեշտեց Սվիտալսկին:

Առավել մանրամասն՝ տեսանյութում: