Արթուր Ալեքսանյանն ու Մաքսիմ Մանուկյանը մեքենաներ նվեր ստացան

Մոսկվաբնակ հայ գործարար Էդգար Արամյանը «Տոյոտա Կորոլա» մակնիշի ավտոմեքենաներ նվիրեց հունահռոմեական ոճի ըմբշամարտի աշխարհի 2017 թ. չեմպիոններ Արթուր Ալեքսանյանին (98 կգ) եւ Մաքսմին Մանուկյանին (80 կգ): Միջոցառումը տեղի ունեցավ այսօր՝ սեպտեմբերի 4-ին, ՀՀ Սպորտի եւ երիտասարդության հարցերի նախարարությունում: Բացի մարզիկներից ու հունահռոմեական ոճի ըմբշամարտի հավաքականի գլխավոր մարզիչ Լեւոն Ջուլֆալակյանից՝ ներկա էր նաեւ Սպորտի եւ երիտասարդության հարցերի նախարար Հրաչյա Ռոստոմյանը:

«Աշխարհի ամենալավ բաներից մեկն այն է, որ զգում ես, որ գնահատված ես, եւ հակառակը՝ ամենավատն այն է, որ զգում ես, որ գնահատված չես: Կան մարդիկ, որոնց պարտականությունների մեջ չի մտնում, բայց ցանկություն են հայտնում օժանդակելու, խրախուսելու: Եվ նորից եմ ասում՝ կարեւորը, որ կա վերաբերմունք»,- ասաց Ռոստոմյանը:

Էդգար Արամյանը ներկա է եղել օգոստոսի 21-26-ը Փարիզում անցկացված աշխարհի առաջնությանը եւ երկրպագել է մասնակից բոլոր հայ ըմբիշներին: Նշում է, որ շատ ուրախ է տղաների հաղթանակներով եւ հուսով է, որ հայ մարզիկները կշարունակեն բարձր մակարդակով ներկայացնել հայրենիքը միջազգային ասպարեզում:

«Ես շատ հուզված եմ, շատ էմոցիաներով եմ լցված: Դահլիճում եմ եղել, ձայնս մինչեւ հիմա չի վերականգնվել: Ես շատ ուշադիր եմ հայկական սպորտի նկատմամբ, ցանկացած հաղթանակ իմ հաղթանակն է: Ես շնորհակալություն եմ հայտնում նրանց ծնողներին, մարզիչներին, որ այդքան ջանք են թափել: Ցանկանում եմ, որ այս ավանդույթները շարունակվեն»,- ասաց նա՝ ավելացնելով, չի կարծում, որ նվերներ տալով ինչ-որ հերոսություն է անում:

Մաքսիմ Մանուկյանը եւ Ռիո 2016-ի չեմպիոն, աշխարհի ու Եվրոպայի եռակի չեմպիոն Արթուր Ալեքսանյանը շնորհակալություն հայտնեցին: Նրանք ընդգծեցին, որ շատ զգացված են ուշադրության համար: