Կրծքով կերակրման օգուտները մոր օրգանիզմին

Այն կանանց մոտ, որոնք առնվազն 3 տարի (ամբողջ կյանքի ընթացքում) կրծքով են կերակրել երեխաներին, էնդոմետրիոզի վտանգը 40%-ով պակաս է, քան նրանց մոտ, ովքեր կրծքով չեն կերակրել կամ դա երկար չեն արել: Այս մասին հաղորդում են Brigham and Women's Hospital-ից գիտնականները:

Մասնագետների կարծիքով՝ բանն այն է, որ կրծքով կերակրելն ազդում է կնոջ հորմոնալ համակարգի վրա, իսկ էնդոմետրիոզի առաջացման վտանգը կապված է հենց հորմոնների հետ: Կրծքով կերակրելու յուրաքանչյուր երեք լրացուցիչ ամիսը, հետազոտության արդյունքների համաձայն, էնդոմետրիոզի առաջացման վտանգը նվազեցնում է 8%-ով, իսկ եթե կինը երեխային միայն կրծքի կաթով է կերակրում՝ արհեստական կաթ չտալով, վտանգը նվազում է 14%-ով:

Համոզվելու համար, որ կրծքով կերակրելու եւ էնֆոմետրիոզի միջեւ իսկապես կապ կա, գիտնականները վերլուծել են 72.394 կանանց տվյալներ, որոնք 6 ամսից ավելի տեւած առնվազն մեկ հղիություն են ունեցել: Գիտնականներն այդ կանանց առողջությանը հետեւել են 20 տարի: Նրանք հայտնել են, թե երեխայի ծնվելուց հետո որքան ժամանակ են կրծքով կերակրել երեխային եւ ծննդաբերությունից քանի ամիս անց է վերականգնվել նրանց դաշտանի ցիկլը: 20 տարվա ընթացքում էնդոմետրիոզ է ախտորոշվել 3296 կնոջ մոտ:

Գիտնականները պարզել են, որ մի քանի երեխա լույս աշխարհ բերած եւ նրանց առնվազն 3 տարի (ընդհանուր առմամբ) կրծքով կերակրած կանայք ավելի քիչ են բախվում էնդոմետրիոզի խնդրին:

Հետազոտության արդյունքները հրապարակվել են The BMJ ամսագրում: