Ո՞վ կդառնա Հայաստանի Նավալնին

Առաջին / Ալեքսեյ Նավալնիի հերթական կոռուպցիոն բացահայտումը դառնալու է Ռուսաստանի քաղաքական կյանքի սկանդալներից մեկը: Ռուսաստանի ընդդիմության խարիզմատիկ առաջնորդի թիրախն այս անգամ հենց Վլադիմիր Պուտինն է, ով Նավալնիի և «Դոժդ» հեռուստաընկերության համատեղ հետաքննության համաձայն` ոչ միայն կոռուպցիոներ է, այլ նաև տիրապետում է մեծ կարողությունների:

Սանկտ Պետերբուրգից քիչ հեռու՝ Վիբորգում գտնվող շքեղ առանձնատներից մեկը, որը երկու անգամ օգտագործվել է Շերլոկ Հոլմսի մասին պատմող ֆիլմի նկարահանումների համար, պատկանում է Ռուսաստանի նախագահ Վլադիմիր Պուտինին, թեև այդ մասին պաշտոնական հայտարարագրերում ոչինչ նշված չէ: Ինչպես Պուտինի մյուս առանձնատները` այս մեկը ևս նշված է «Բալթյան» մեդիախմբի ղեկավար Օլեգ Ռուդնովի անունով, ով Ռուսաստանի առաջնորդի մտերիմ ընկերներից մեկն է: Մի հանգամանք ևս հուշում է, որ Վիբորգի շքեղ առանձնատունը պատկանում է Պուտինին. առանձնատունը գտնվում է խստագույն հսկողության տակ, շարքային քաղաքացիները դրան նույնիսկ չեն կարող մոտենալ։

Ռուսաստանում այդպես պահպանվում են միայն Պուտինի տարածքները: Կասկած չկա, որ սկանդալային բացահայտումը Նավալնիի նախագահական հայտի առանցքային դրվագներից մեկն է` թեև բոլորի համար է ակնհայտ, որ նրան թույլ չեն տալու մասնակցել ընտրություններին:

Հարցն այն չէ, որ Պուտինը կասկածում է, որ հաղթանակ է տանելու 2018-ի մարտի նախագահական ընտրություններում: Տոտալիտար Ռուսաստանում այլ կերպ լինել չի կարող, եթե նույնիսկ Նավալնին մասնակցի ընտրություններին: Խնդիրն այլ հարթության վրա է. ռուսական համակարգը սարսափում է այն հեռանկարից, որ համապետական ընտրություններով կֆորմալիզացվի Նավալնիի այլընտրանքային կենտրոն լինելը: Դա կլինի Պուտինի համակարգի վերջի սկիզբը, որովհետև իրական այլընտրանքը ռուսաստանցիներին կվերադարձնի ընտրության և քաղաքական մրցակցության հնարավորությունը, ինչը մի քանի տարվա ընթացքում բարոյապես կոչնչացնի Պուտինի համակարգը, որը կառուցված է «ազգային համաձայնության» կեղծ առանցքի վրա:

ամբողջությամբ՝ կայքում