Ջունգլի կողմից ծեծելով սպանված ազատամարտիկի գործով երրորդ փորձաքննությունն է նշանակվել

2014 թվականին Ջունգլ մականունով Գևորգ Սարգսյանի, նրա հոր՝ Բաբկեն Սարգսյանի և իր մերձավոր 2 բարեկամների կողմից ծեծելով սպանված ազատամարտիկ Վարդան Թումանյանի գործով դեպքից երեք տարի անց երրորդ դատաբժշկական փորձաքննությունն է նշանակվել: Այդ մասին «Առաջին լրատվական»-ին փոխանցեց Վարդան Թումանյանի քույրը՝ Մարիետա Թումանյանը:

Հիշեցնենք, որ այդ անձիք ազատամարտիկին ծեծի էին ենթարկել շենքի բակում, նրա կնոջ և դստեր ներկայությամբ: Ազատամարտիկը ծանր վիճակում տեղափոխվել էր հիվանդանոց, ապա մահացել էր: Դեպքից հետո նշանակված դատաբժշկական փորձաքննությունը հաստատել էր, որ մահը վրա էր հասել բութ գործիքով գլխին հասցված հարվածներից: Դեպքից հետո մեղավորները ձերբակալվեցին, կալանավորվեցին, ապա հերթով ազատ արձակվեցին՝ ստորագրությամբ քաղաքից չբացակայելու հիմքով:

Եվ որքան էլ տարօրինակ էր, դեպքից մեկ տարի անց գործում հայտնվեց երկրորդ փորձաքննության եզրակացությունը, որում արձանագրված է, որ ազատամարտիկը բնածին հիվանդ է եղել, գլխուղեղի հետ կապված խնդիր է ունեցել և այդ օրը պետք է մահանար, պարզապես մահը համընկել էր դեպքի հետ:

Տուժող կողմի միջնորդությամբ անկախ փորձաքննություն էր նշանակվել, որը հերքել էր վերը նշված եզրակացությունը, որից հետո պաշտպանական կողմը բավականին ոգևորվել էր և աջ ու ձախ հայտարարում էին, որ իրենք մեղավոր չեն:

Սակայն մի քանի օր առաջ կրկին փորձաքննություն նշանակելու միջնորդություն է արել մեղադրող դատախազը, որը բավարարվել է: Այսինքն՝ դարձյալ պետք է պարզվի, թե ինչի արդյունքում է վրա հասել Վարդան Թումանյանի մահը: «Հավանաբար մի քանի ամիս էլ այս փորձաքննությունը կտևի, որից հետո նոր դատական պրոցեսը կշարունակվի: Պետք է փորձագետների խումբ հրավիրվի, փորձաքննությունը նշանակվի, և հուսով ենք՝ այս անգամ արդարացի եզրակացություն կլինի»,- ասաց տիկին Թումանյանը:

Նշենք, որ ազատության մեջ հայտնված Ջունգլն ու իր ազգական հանցակիցները կրկին անազատության մեջ են: Ազատության մեջ հայտնվելուց հետո մի քանի անգամ հայտնվել էին տարբեր միջադեպերի և նոր հանցագործությունների կենտրոնում: Վերջին անգամ էլ Ջունգլը փողոցում իր կնոջը ծեծելու և քարշ տալու համար ձերբակալվեց: Թեև կարճ ժամանակ անց կինը բողոքը հետ վերցրեց, սակայն մեղադրող դատախազը պնդել է, որ նրա՝ ազատության մեջ մնալը վտանգավոր է, որից հետո Ջունգլը կալանավորվեց: Նրա հանցակից եղբայրը՝ Սարգիսը նույնպես կալանավորվեց կեղծ փողերի շրջանառության մեղադրանքով:

Նշենք նաև, որ բացի այս գործից, զուգահեռ ընթանում է նաև մեկ այլ գործ: Այս անգամ Ջունգլի մայրը դատի է տվել Մարիետա Թումանյանին իրեն զրպարտելու համար և 2 միլիոն դրամ է պահանջում: Այս գործով դատաքննությունը նույնպես սկսվել է: