Կրակոցներ են լսել, դուրս եկել․ հրապարակվեցին երրորդմասցի Լյովիկի սպանության ցուցմունքները

Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում այսօր՝ սեպտեմբերի 13-ին, «Երրորդմասցի Լյովիկի» եւ նրա երկու ընկերների սպանության գործով հրապարակվել են վկաների ցուցմունքները, որոնք բացակայում են Հայաստանից:

Դատավորը ընթերցել է երկու վկայի ցուցմունք: Վկաները երկուսն էլ պատմել են, որ գնացել են «Նուբարաշեն» ՔԿՀ իրենցից մեկի եղբորը տեսակցության: Նրանք նաեւ գործով տուժողների ծանոթներն են եղել, որոնցից մեկին՝ Մեսրոպ Նազարյանցին տեսել են ՔԿՀ-ի մոտ, իմացել, որ նույն մարդուն տեսակցության է գալու նաեւ ինքը Լեւոն Ղազարյանի հետ: Վկաները պատմել են, որ կալանավայրի ներսում են եղել, երբ կրակոցներ են լսել, դուրս եկել, տեսել տուժողներին անշարժ ընկած: Նրանք պատմել են նաեւ, որ Լեւոն Ղազարյանին, որը դեռ ողջ է եղել, խորը շունչ է քաշել, տեղավորել են մի պատահական մեքենայի մեջ, որ նրան հիվանդանոց հասցնի:

Դատական նիստն այսքանով ավարտվել է:

Ըստ մեղադրական եզրակացության` Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը նախնական համաձայնությամբ ապօրինի ձեռք են բերել եւ պահել զենք:

2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը («Ծգլ») նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը:

Հիշեցնենք, որ 2015թ. մարտի 4-ին, ժամը 13:59-ին, ոստիկանությունը ահազանգ էր ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել էին 1 զոհի եւ 2 վիրավորի, վիրավորներին տեղափոխել էին «Էրեբունի» ԲԿ, ճանապարհին նրանք մահացել էին։ Կրակոցների հետեւանքով մահացած երեք անձանցից մեկը Լեւոն Ղազարյանն էր, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը:

Աղբյուրը՝ news.am