«Նաիրիտ»-ում բռնկված հրդեհը սաստկանում է․ զոհերի և վիրավորների մասին տեղեկություններ չկան

«ՀԺ» / Երեւանի «Նաիրիտ» քիմիական գործարանում այսօր բռնկված հրդեհը սաստկանում է: Գործարանի մուտքերի մոտ լրագրողների տեղաշարժը սահմանափակված է՝ անվտանգության նկատառումներից ելնելով: Գործարան են ժամանում մեծ թվով հրշեջները, սակայն բռնկված հրդեհը սաստկանում է, կրակի տրամագիծը մեծանում:

Ավելի վաղ տեղեկացրել էինք, որ oգոստոսի 28-ին՝ ժամը 13:10-ին, ՀՀ արտակարգ իրավիճակների նախարարությունում ահազանգ է ստացվել, որ հրդեհ է բռնկվել Երեւան քաղաքի «Նաիրիտ» գործարանի տարածքում: Հրդեհի բարդության «թիվ 2» կանչով դեպքի վայր է մեկնել վեց մարտական հաշվարկ:

Առավել մարամասն քիչ անց:

15:00- Հրդեհը դեռեւս հանգցված չէ, չնայած նրան, որ մեծ թվով հրշեջներ են աշխատանում տարածքում: Ըստ նախնական տեղեկությունների, զոհեր չկան, վիրավորների մասին տեղեկություն չկա, բայց շտապօգնության երկու մեքենա մուտք գործեցին գործարանի տարածք:

«Նաիրիտի» աշխատակիցների պնդմամբ՝ հրդեհը բռնկվել է շոգ եղանակի հետեւանքով, պայթյունի ձայն իրենք չեն լսել:

Տարածքում նաեւ կան «Սանիտեք» ընկերության ջրով բեռնված մեքենաներ:

15:10- «Նաիրիտ» գործարանում բռնկված հրդեհը մեկուսացվել է, կրակի տարածման վտանգ չկա. այրվող նյութը վտանգ չի ներկայացնում:

Այս մասին հայտնեցին ՀՀ արտակարգ իրավիճակների նախարարության լրատվական ծառայությունից` անդրադառնալով armtimes.com-ի հարցին, թե այրվող տարածքին մոտիկ ապրող բնակիչներն ինչ գործողություններ պետք է ձեռնարկեն` իրենց առողջությունը եւ անվտանգությունը պաշտպանելու համար:

Առայժմ, սակայն չի նշվում, թե ինչ նյութ է այրվում գործարանում:

Այսօր` օգոստոսի 28-ին` ժամը 13:10-ին, Արտակարգ իրավիճակների նախարարությունում ահազանգ է ստացվել, որ Երեւան քաղաքի «Նաիրիտ» գործարանի տարածքում պայթյունի ձայն է լսվել եւ հրդեհ է բռնկվել:

Հրդեհի բարդության «թիվ 3» կանչով դեպքի վայր են մեկնել տասը մարտական հաշվարկ եւ Ճգնաժամային կառավարման կենտրոնի արտակարգ իրավիճակների արձագանքման եւ օպերատիվ խմբերը:

Նշվում է, որ հրդեհը մեկուսացվել է ժամը 14:00-ի սահմաններում: