Ստրեսի ենթարկված արջը Խոսրովի արգելոցում հարձակվել է հրշեջների վրա

«ՀԺ» / Խոսրովի արգելոցում մի քանի օր տեւած հրդեհը խոշոր վնասներ հասցրեց տարածքի բուսականությանը: Այս ընթացքում դրա չափերի վերաբերյալ հնչել են տարբեր գնահատականներ, իսկ կենդանական աշխարհի մասին տեղեկություններ չկային:

ՀՀ բնապահպանության նախարարությունից փորձեցինք պարզել` այդ առնչությամբ ինչ-որ ուսումնասիրություններ ունե՞ն: Պատասխանեցին, որ համապատասխան տվյալների դեռ չեն տիրապետում: Կարճ ժամանակ անց նախարարի խոսնակը գրառում կատարեց ֆեյսբուքյան իր էջում:

«Քիչ առաջ հաջողվեց կապ հաստատել Խոսրովի անտառ պետական արգելոցի տնօրեն Հրաչյա Հովակիմյանի հետ, ով տեղեկացրեց, որ այս պահին անձրեւ չկա, օդային օպերացիաներից հետո, եւ տեղացած անձրեւը բավականին արդյունք տվել է: Ներկայում հրդեհաշիջման աշխատանքների բոլոր մասնակիցները կրկին գործի են անցել տեղայնացված հրդեհի օջախները մարելու նպատակով: Ըստ ՀՀ ԲՆ Կենսառեսուրսների գործակալության բնության հատուկ պահպանվող տարածքների եւ դենդրոպարկերի կառավարման բաժնի պետ Արամ Աղասյանի՝ խոշոր կաթնասունները, թռչունները չեն տուժել եւ արգելոցի այլ տարածքներ են տեղափոխվել, հիմնականում չթռչող միջատները, սողունները, կրծողներն են տուժել հրդեհից: Սրանք նախնական տվյալներն են, հիմնական ուսումնասիրությունները եւ հաշվարկները կկարտարվեն արդեն հրդեհաշիջման աշխատանքների ամբողջական ավարտից հետո: Աղասյանը պարզաբանել է, որ հրդեհն ընդգրկած 2,5-3 հազար հա գոտում անգամ կան տարածքներ՝ ավազուտներ, կղզյակներ, որտեղ կենդանիները կարող էին պատսպարվել կրակից»,- նշել է Մարինե Կարապետյանը:

Հավելենք, որ Վայրի բնության համաշխարհային հիմնադրամի (WWF) հայաստանյան մասնաճյուղի տնօրեն Կարեն Մանվելյանը, aravot.am-ի հետ զրույցում երեկ անդրադառնալով Խոսրովի արգելոցում բռնկված հրդեհին ու դա հետեւանքներին` մասնավորապես, ասել էր.

«Խոշոր կաթնասունները, հաստատ փախել են, նրանք չեն այրվել, ուղղակի սթրեսային վիճակում են: Մեզ պատմեցին, որ արջի քոթոթը դուրս էր եկել ու հարձակվում էր հրդեհը հանգցնողների վրա, արգելոցի աշխատակիցների, որովհետեւ կորցրել էր մորը, բայց կգտնեն իրար, հենց ծուխը նստի, քոթոթն ու մայրը կգտնեն իրար: Քարայծը, լուսանը, գորշ արջ, նրանք կփրկվեն, հիմա նրանք կողքի տարածքներն են գնացել: Հավանաբար, այրվել են մանրները, կրծողները, սողունները, միջատները: Նապաստակներն էլ»: