Վատերի թոփ-հնգյակը

Հայաստանում շարունակվում է վարչապետաց շաբաթը։ Հովիկ Աբրահամյանն արդեն պատմություն է, այնպես որ, համայն ուշադրություն ենք դարձնելու Կարեն Վ. Կարապետյանին։ 14-րդ վարչապետին։ Թեպետ երեկ նոր վարչապետի (իհարկե, նա դեռ վարչապետի թեկնածու է, բայց որ գրենք վարչապետ, դրանից շատ բան չի փոխվի, Մ.Ղ.) շուրջ չէին հիմնական թեժ քննարկումներն ընթանում։

Շատ ավելի բուռն քննարկումներ են գնում ապագա կառավարության մասին, թե ովքեր տեղ կունենան այնտեղ, իսկ ովքեր` հրաժեշտ կտան իրենց պաշտոններին։ Այդ առումով բավական հետաքրքիր էր երեկ Panarmenian.net-ի անցկացրած հարցումը, թե «Կառավարությունից ում հրաժեշտ կտայիք առանց վարանումների»։ Ընդ որում, բավական խոհեմաբար հայտնելով, որ «Աշխատանքից ազատել բոլորին» տարբերակ չի լինելու, թե չէ մեր ազգի կեսը հաստատ բոլորին կազատեր աշխատանքից` անկախ նրանից, նրանց մեջ նորմալ նախարարներ կա՞ն, թե՞ ոչ։

Ինչպես եւ սպասվում էր, առաջին տեղը զբաղեցրել է ՀՀ արտգործնախարար Էդվարդ Նալբանդյանը։ Փառք աստծո, գոնե կա մի դեպք, երբ նա առաջին պլանում է հայտնվում։ Թե չէ` կորած է, մոլորված է, ինչ ասես, որ չեն ասում։ Արտգործնախարարին այլեւս չտեսնելու ցանկություն է հայտնել հարցվածների 16,15 տոկոսը։ Երկրորդ եւ երրորդ տեղերում ֆինանսների նախարար Գագիկ Խաչատրյանն (15,6) ու տրանսպորտի եւ կապի նախարար Գագիկ Բեգլարյանը (14,9)։ Այս դեպքում, մեր կարծիքով դեր է խաղացել ոչ թե նրանց լավ կամ վատ աշխատանքը, այլ որ երկուսն էլ համարվում են կառավարության ամենաազդեցիկ ու օդիոզ ֆիգուրներից։

Իհարկե, կա նաեւ դավադրության տեսությանը համապատասխանող պահ. մամուլում արդեն հրապարակումներ եղան, որ Կարեն. Վ. Կարապետյանը մտադիր է առաջին հերթին ազատվել այս նախարարներից, հատկապես` Գագիկ Բեգլարյանից։ Եվ` ըստ այդմ, հարցման արդյունքները քիչ մը համապատասխանեցվել են այդ հրապարակումներին։ Բայց սա` զուտ դավադրության տեսության համաձայն։

Այս երկուսից այնքան էլ ետ չեն մնացել սփյուռքի նախարար Հրանուշ Հակոբյանը` 12.05% եւ մշակույթի նախարար Հասմիկ Պողոսյանը։ Զարմանալի է, որ Հասմիկ Պողոսյանին չուզողների թիվը ավելի մեծ է, քան` Հրանուշ Հակոբյանինը, քանի որ Հասմիկ Պողոսյանը գոնե մեկումեջ բաներ-մաներ է անում ու ասում, իսկ ահա Հրանուշ Հակոբյանը` անիմաստ նախարարությամբ անիմաստ գումարներ է վատնում` պարբերաբար տհաճ պատմությունների մեջ ընկնելով այլմոլորակայինների եւ տիեզերական այլ էակների հետ։

ԴԱՎԱԴՐԱԲԱՐՈ

Սա` հասարակության կողմից «ազատված» նախարարների թոփ հնգյակն էր։ Մնացածների հանդեպ բացասական վերաբերմունքը քիչ է։ «Հետնապահների» շարքում միայն պաշտպանության նախարար Սեյրան Օհանյանն է առանձնանում` 5,09։ Համարենք, որ Ս. Օհանյանը նույնպես անցել է 5 տոկոսի «շեմը»։

Ու մեկ էլ շատ զարմանալի է, որ քաղաքաշինության նախարար Նարեկ Սարգսյանը հարցվածների ընդամենը 4,66 տոկոսի համար է աշխատանքից ազատվելու թեկնածու։ Երկու բացատրություն ունենք. կամ հարցվածների մեծ մասը Երեւանից չի, չի իմանում, թե ինչ օրն է ընկել մայրաքաղաքը Նարեկ Սարգսյանի օրոք, կամ էլ` նորից պիտի անցնենք դավադրության տեսությանը, ըստ որի Նարեկ Սարգսյանին Երեւանի գլխավոր ճարտարապետ 2011թ. մայիսին նշանակել է հենց... Կարեն Վ. Կարապետյանը` այն ժամանակվա Երեւանի քաղաքապետը։ Դատելով այս հարցման արդյունքներից, Նարեկ Սարգսյանը կպահպանի իր աթոռը։

Իսկ հասարակության համար ամենաընդունելի նախարարը` ըստ հարցման, արտակարգ իրավիճակների նախարար Արմեն Երիցյանն է, որին նոր կառավարություն չի ցանկանում տեսնել 0,35 տոկոսը։ Նույնիսկ կարող ենք ասել, թե ովքեր են դեմ քվեարկել. նրանք, ովքեր աչք ունեն ԱԻՆ նախարարի պաշտոնի վրա։ Ուրիշ վարկած չունենք, քանի որ ԱԻՆ-ը մեր ամենալավ, հստակ ու արդյունավետ աշխատող կառույցներից մեկն է։

ԵԶՆ ԸՆԿԱՎ

Մի հետաքրքիր դիտարկում. իշխանամետ գործիչներն արդեն սկսել են Կարեն Վ. Կարապետյանին գովել։ Դա հասկանալի է։ Բայց շատ զարմանալի է, թե ինչպես են դա անում։ Շատ տգեղ բան է ստացվում։ Օրինակ, երեկ ՀՅԴ խմբակցության ղեկավար Արմեն Ռուստամյանին Aravot.am-ը հարցնում է. թե Կարեն Կարապետյանի գալով նույն մարդիկ, որոնք սովոր են նախկին կոռուպցիոն համակարգում աշխատել, փոխվելո՞ւ են, նույն համակարգում չե՞ն աշխատելու, պատասխանել է. «Նույն Կարեն Կարապետյանի հետ կապված ոչ ոք այդպիսի բան չի ասում, այդ մարդը չի տվել առիթ՝ նման եզրակացություններ անելու։ Հիմա ինչո՞ւ են ուզում վատը տեսնել բոլորի մեջ, էս մեկը հո լավն է»։

Այսինքն` ըստ Արմեն Ռուստամյանի, նախկին վարչապետը` Հովիկ Աբրահամյանը, վատն էր։ Բայց մենք չենք հիշում, որ Արմեն Ռուստամյանը երբեւիցե նման բան ասած լիներ, քանի դեռ վարչապետը չէր փոխվել։ Ու այս ոճով շատերն են երեկ տեսակետ հայտնել։ Մյուսն ասել է. Կարեն. Վ. Կարապետյանը լավ մենեջեր է։ Ուրեմն, Հ. Աբրահամյանը վատ մենեջեր է։ Կարեն Վ. Կարապետյանը անբասիր կենսագրություն ունի։ Ընդունում են, որ Հ. Աբրահամյանը մութ անցյալ ունի։ Գոնե սպասեն, մի շաբաթ անցնի։

Մհեր ՂԱԼԵՉՅԱՆ, «Չորրորդ իշխանություն»