«Ես 40 տարեկան եմ, ես մարդասպան չեմ»․ շարունակվել է աղմկահարույց սպանության գործով դատավարությունը

Փաստինֆո / «Պատանի լրագրողներ» դպրոցի տնօրենի կողմից 22-ամյա ապագա բժիշկ Լևոն Սահակյանի սպանության աղմկահարույց գործով այսօր շարունակվեց վկաների հարցաքննությունը:
Մասնավորապես, «Պատանի լրագրողներ» դպրոցում որպես կոորդինատոր, լուսանկարիչ ու ռեժսորի օգնական աշխատած վկա Անահիտը հայտնեց, որ իր աշխատասենյակում օրվա նյութերն էր ուսումնասիրում, երբ հայհոյանքներ, աղմուկ, ապակու կոտրվելու ձայներ է լսել տնօրենի սենյակից: Կոնկրետ ինչ-որ բան չեմ տեսել, ասաց նա:
Իր հետ նույն սենյակում գտնվող գործընկեր Գևորգը դուրս է եկել՝ ըստ երևույթին հաշտեցնելու, բաժանելու, մի քանի րոպե հետո վերադարձել է, երևի ամեն ինչ հանդարտվել էր, հինգ րոպե անց եկել է նաև Վահան Ղազարյանը ու ներողություն խնդրել իրենից հայհոյանքների ու գոռգոռոցների համար:
Վկան, ով երկու-երեք շաբաթ է աշխատել ամբաստանյալի հետ, տվեց նրա բնութագիրը՝ Վահանն այն մարդը չէր, որ կյանք խլեր, բարեհամբույր, հոգատար մարդ է, «նկարահանման ժամանակ մեր հետ հավասար աշխատում էր»:
Ըստ վկայի՝ ինքն իմացել է, որ տնօրենը տուժողի նշանածին աշխատավարձի պարտք ուներ, որը քիչ-քիչ վերադարձնում էր: Ըստ երևույթին, տնօրենն ու Արեգնազի նշանածն իրար չեն հասկացել: «Իմացա, որ Լևոնը փորձել է տեսախցիկը գումարի փոխարեն վերցնել, իմացա, որ դանակահարություն է եղել»:
Վահանը կեսգիշերն անց իրեն զանգահարել է, նորից ներողություն խնդրել հայհոյանքների համար: «Վահանին ճանաչելով՝ իրեն երևի հետաքրքրում էր՝ վախեցե՞լ եմ, թե՞ ոչ»: Վկան չհիշեց, որ դեպքին հաջորդող գիշերը զանգել է Վահան Ղազարյանին, վկայի հիշելով՝ միայն առավոտյան է զանգահարել նրան: Պարզվեց, որ վկան ութ անգամ զանգել է ամբաստանյալին, որից չորս անգամը՝ գիշերը: Վկան արձագանքեց՝անկեղծ, չեմ հիշում:
Երկրորդ վկան ռեժիսոր է, նախկինում աշխատել է Վահան Ղազարյանի հետ: Դեպքի օրը երեկոյան տասի կողմերը իրեն է զանգահարել Վահանը, պատմել դեպքի մասին, ապա տվել Լևոնի հեռախոսահամարը՝ խնդրելով, որ զանգի ու հետաքրքրվի ինչ է եղել, որտեղ է: «Ինձ թվում է զղջացել է, մտահոգված էր»,- ասաց վկան:
Զանգից հետո վկան բերման է ենթարկվել ոստիկանություն, ապա իրեն հայտնել են, որ Վահանը հանձնվել է, և իրեն բաց են թողնում:

Ըստ ամբաստանյալ Վահան Ղազարյանին առաջադրված մեղադրանքի, նա Թերլեմազյան փողոցի 3-րդ հասցեում, Լևոն Սահակյանի նշանածին աշխատավարձ չվճարելու հարցի շուրջ Լ.Սահակյանի հետ վիճաբանության և քաշքշուկի մեջ է մտել, որի ժամանակ իր մոտ առկա ծալովի դանակով մեկ անգամ հարվածել է վերջինիս ոտքին և մեկ անգամ կրծքավանդակի շրջանին, որի հետևանքով Լ. Սահակյանը մահացել է: