Ինչպես են հայերն ու ռուսները քցում խաղացողներին ու խաղեր ծախում

1in.am / Ռուս ֆուտբոլիստ Պավել Կոնդրախինի՝ նախօրեին հայկական և ռուսական ֆուտբոլի վերաբերյալ սկանդալային հարցազրույցը կարծես անպատասխան մնաց: 24-ամյա հարձակվողը, ով ժամանակին հանդես է եկել Երևանի «Ուլիսում», ռուսական Sports.ru պարբերականին տված հարցազրույցում հայտարարել էր, որ երևանյան ակումբում բառի բուն իմաստով քցել են իրեն, իսկ ակումբի ղեկավարությունը՝ Վալերի Հովհաննիսյանի գլխավորությամբ, մի քանի ֆուտբոլիստների օգնությամբ ծախել է խաղերը: Նշենք, որ Հովհաննիսյանը ներկայում Մոսկվայի «Արարատի» նախագահն է:

«Այն, ինչ տեղի էր ունենում Հայաստանում, ուղղակի դժվար է նկարագրել: Դժվար է պատկերացնել, որ ֆուտբոլում նման երևույթներ են տեղի ունենում: Սկզբում ամեն ինչ կարգին էր: Բարձրակարգ մարզիչ էր, որի հետ հաճելի էր աշխատել, բայց 5 տուր անց նա հրաժարական տվեց: Ինչպես պարզվեց՝ դա եղավ այն պատճառով, որ խաղերը ծախվում էին: Այնուհետև եկավ Հովհաննիսյանը և մեծ ժողով կազմակերպեց: Նա ասաց, որ կվճարի մեր բոլոր պարտքերը՝ հորդորելով խաղալ և փորձել արդյունք ցույց տալ: Մենք 4 ամիս ապրել ենք հյուրատանը՝ առանց գրոշի: Ամեն օր ուտում էինք էժանագին ուտելիքներ: Դրանից հետո մեզ հետադարձի տոմսեր գնեցին և բարի ճանապարհ մաղթեցին: Հայերն այդպես էլ չվճարեցին մեր աշխատած գումարը: Իսկ դրանից հետո հայկական մամուլում գրեցին, որ ակումբի ներկայացուցիչները ձերբակալվել են պայմանավորված խաղերի համար: Ես հանգիստ խղճով կարող եմ ասել, որ նման խարդախ գործերով չեմ զբաղվել: «Ուլիսում» հանդես եկող ռուս տղաները ևս չեն մասնակցել այդ «մախինացիաներին»: Զբաղվում էին այլ մարդիկ: Երևանը շատ գեղեցիկ քաղաք է, այնտեղ ապրում են բարի մարդիկ, բայց այն, ինչ տեղի էր ունենում «Ուլիսում», ուղղակի կրկես էր: Շատ դժվար էր նստել այնտեղ առանց գումարի: Կարծում եմ՝ անհարմար է, երբ անգամ բարեկամներից պարտքով գումար ես խնդրում: Բայց ինչ արած, ստիպված էի, քանզի մղձավանջային վիճակում էի գտնվում: «Ուլիսում» քցեցին և 4 ամսվա աշխատավարձս այդպես էլ չտվեցին»,- հայտարարել էր Կոնդրախինը:

Վերջինս նշել է նաև, որ նույն խայտառակ պատկերը տիրում է Ռուսաստանի երկրորդ դիվիզիոնում, որտեղ հիմա հանդես է գալիս Վալերի Հովհաննիսյանի «Արարատը»: «Խաղալով Բրյանսկի «Դինամոյում»՝ ստանում էի 50 հազար ռուբլի աշխատավարձ: Սպասում էի «Ուլիսից» պաշտոնական հրավերի, որը տևեց 2 ամիս: Մարզիչն ինձ ասաց, որ ակումբում աշխատավարձի տեղ այլևս չկա, սակայն պետք է նոր ֆուտբոլիստի ընդգրկենք թիմ: Նա ասաց ինձ. «Պաշա, Աստծո անունով երդվում եմ, արի քո աշխատավարձը թղթի վրա դարձնենք 30 հազար, իսկ նոր ֆուտբոլիստինը՝ 20 հազար: Երդվում եմ մորս անունով, որ դու քո 50 հազարը կստանաս: Ես համաձայնեցի, բայց եկավ աշխատավարձի օրն ու ստացա 30 հազար: Ես մոտեցա մարզչին և աղմուկ բարձրացրի, որից հետո հայտնվեցի պահեստայինների նստարանին: «Դինամոյի» ղեկավարները գումար էին վաստակում խաղեր ծախելով: Նշեմ, որ հիմնական կազմի 11 ֆուտբոլիստներից 8-ը տեղյակ չէին խաղի ծախված լինելու մասին»,- նշել է Կոնդրախինը:

Վերջինս հայտարարել է նաև, որ ժամանակին Մոսկվայի «Լոկոմոտիվը» մեծ գումար է իրենից պահանջել թիմի, այսպես ասած, «դուբլում» խաղացնելու համար: «Ձեր տղան տաղանդավոր է, բայց մենք էլ մեր երեխաներին պետք է կերակրենք՝ ասացին նրանք մորս: Մայրս շոկի մեջ էր»,- հավելել է ռուս ֆուտբոլիստը, ով այժմ հանդես է գալիս ամերիկյան «Տալսու Ռեֆեկնս» ակումբում: