Ինչ է տեղի ունեցել իրականում

Երեկ լրահոսում երկու պաշտոնական հաղորդագրություն հայտնվեց, որոնք, մեղմ ասած, որոշ հարցեր են առաջացնում։ Առավոտյան դեռեւս ԼՂՀ ՊՆ մամուլի ծառայությունը հաղորդագրություն տարածեց, որտեղ ասված էր. «Սեպտեմբերի 7-ին` ժամը 01։30-ի սահմաններում, ՊԲ հյուսիս-արեւելյան ուղղությամբ տեղակայված զորամասերից մեկի պահպանության տեղամասում, մարտական հերթապահության կրման կանոնների խախտման արդյունքում, մահացու հրազենային վիրավորում է ստացել զինծառայող, 1997թ. ծնված Արման Ալիկի Ղանդիլյանը։ Դեպքի մանրամասները պարզելու համար կատարվում է քննություն»։

Դրանից ժամեր անց ԼՂՀ նախագահ Բակո Սահակյանի պաշտոնական կայքէջում հայտնվեց մի հաղորդագրություն՝ հետեւյալ վերնագրով. «Հրամանագիր հետմահու պարգեւատրման մասին»։ Հաղորդագրության բովանդակությունը հետեւյալն էր. «Նախագահ Բակո Սահակյանը սեպտեմբերի 7-ին ստորագրել է հրամանագիր, համաձայն որի՝ Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար ԼՂՀ պաշտպանության բանակի N զորամասի զինծառայող Արման Ղանդիլյանը հետմահու պարգեւատրվել է «Մարտական ծառայություն» մեդալով»։

Այսինքն՝ մի դեպքում ստացվում է, որ զինծառայող Արման Ղանդիլյանը մահացու հրազենային վիրավորում է ստացել «մարտական հերթապահության կրման կանոնների խախտման արդյունքում», մյուս կողմից՝ արագորեն Բակո Սահակյանը զոհված զինծառայողին հետմահու պարգեւատրում է «Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար»։ Սա, իսկապես, արտառոց զուգադիպություն է։ Հաղորդագրությունների տեքստերի այս հակասությունը հեռուն գնացող ենթադրությունների տեղիք է տալիս ու հարց է առաջանում՝ ի՞նչ է տեղի ունեցել, որ Արցախի նախագահը կայծակնային արագությամբ որոշում է կայացրել «Արիության մեդալ» շնորհել զոհված զինծառայողին։

Հավելենք նաեւ, որ միայն սեպտեմբերի ընթացքում սա զինվորի մահվան նմանատիպ երրորդ դեպքն է։ Սեպտեմբերի 5-ին զինծառայողի մահվան դեպք էր գրանցվել Հայաստանի զինված ուժերում։ ՀՀ ՊՆ զորամասերից մեկի ենթասպա Գեղամ Եղիազարյանի դին հայտնաբերվել էր մարտական դիրք տանող ճանապարհին գտնվող ժայռի տակ։Եվս մեկ դեպք էր գրանցվել սեպտեմբերի 2-ին Պաշտպանության բանակում։ Զինծառայող Արայիկ Օրդուբեկյանը մահացու հրազենային վիրավորում էր ստացել մարտական խնդրի կատարման ժամանակ տեղ գտած հանգամանքներում։ Զինվորի մահվանից հետո ՀՀ քննչական կոմիտեն հայտարարել էր, թե նա զոհվել է հակառակորդի արձակած կրակոցից, սակայն հետագայում այդ վարկածը հերքել էր Լեռնային Ղարաբաղի Պաշտպանության նախարարությունը։

Ի դեպ, օգոստոսի 30-ին safesoldiers.am կայքը ներկայացրել էր 2010-2015 թվականների ընթացքում ՀՀ զինված ուժերում եւ Պաշտպանության բանակում ոչ մարտական պայմաններում գրանցված մահվան դեպքերի վիճակագրությունը։

«Չորրորդ իշխանություն»