Մարզպետի խորհրդականը կորել է

Հրապարակ-ին տեղեկություններ էին հասել, որ Արմավիրի մարզպետի խորհրդական Մանուկ Սիմոնյանը շաբաթ օրվանից տնից դուրս է եկել եւ այլեւս չի վերադարձել։ Այս օրերին մարզպետարանում անհանգիստ մթնոլորտ է, մարզպետն էլ սիրտ չունի որեւէ մեկին տեսնելու, ընդունելու։ Խորհրդականի մասին տեղեկություն չունեն ոչ աշխատավայրում, ոչ էլ հարազատները, իսկ կորելու հավանական պատճառների մասին տարբեր վարկածներ են շրջանառվում՝ նրան բռնել են, գողացել են եւ այլն։

Դիմեցինք ոստիկանություն, լրատվական ծառայությունից մեզ փոխանցեցին, որ հաղորդում ունեն ոստիկանության Արմավիրի բաժնում Մանուկ Սիմոնյանի անհայտ կորելու վերաբերյալ, ձեռնարկվում են միջոցառումներ նրան հայտնաբերելու ուղղությամբ։

Նշենք, որ Մանուկ Սիմոնյանը 52 տարեկան է, ծնվել է Նոր Արմավիր գյուղում, ավարտել է Հոկտեմբերյանի Պրոֆտեխուսումնարանը` ստանալով գինու և հյութերի արտադրման վարպետի մասնագիտացում, ապա ավարտել է Մոսկվայի «Սննդի արդյունաբերության տեխնոլոգիական ինստիտուտը»։

Նա աշխատել է Հայաստանի խաղողագործության և գինեգործության ինստիտուտում` որպես ավագ լաբորանտ, մի շարք ընկերություններում՝ ղեկավար, օրինակ՝ «Նոյ» փակ բաժնետիրական ընկերության նախագահ, «Պարիտեր-Ինվեստ» ՍՊԸ-ի գլխավոր տնօրեն, «Երևանի Կոնյակի գործարան» ՓԲԸ-ում` որպես Արմավիրի մասնաճյուղի «Արաքս» գինու կետի վարիչ: 2000-ից մինչև 2015թ. փետրվարի 27-ը «Պարիտեր-Ինվեստ» ՍՊԸ-ի տնօրեն:

Ի դեպ, 2015թ Մանուկ Սիմոնյանը Արմավիրի քաղաքապետի ընտրություններին առաջադրել է իր թեկնածությունը, սակայն ավելի ուշ ինքնաբացարկի դիմում էր ներկայացրել։ Նա ամուսնացած է, ունի մեկ զավակ: