Գլխավոր դատախազի նշանակմանն սպասելիս

«Հրապարակ»

Սեպտեմբերի 12-ին մեկնարկելիք ԱԺ քառօրյայում, ըստ ամենայնի, գլխավոր դատախազի հարցը չի քննարկվի: Քառօրյայի մեկնարկին մի քանի օր է մնացել, սակայն դեռ պոտենցիալ դատախազի անունը հայտնի չէ: Մինչդեռ հարցը քառօրյայի օրակարգ մտցնելու դեպքում ապագա դատախազն արդեն պետք է հանդիպումներ ունենար խմբակցությունների հետ, ներկայացներ իր ծրագիրը, համոզեր, որ իրեն ընտրեն: Նշենք, որ գլխավոր դատախազին կընտրի Ազգային ժողովը՝ գաղտնի քվեարկությամբ, 6 տարի ժամկետով։ Ընդ որում՝ ՀՀ նախագահն առաջարկելու է մեկ թեկնածու։

Հիշեցնենք, որ գլխավոր դատախազի պաշտոնը թափուր է օգոստոսի 4-ից, երբ Գեւորգ Կոստանյանը հրաժարական տվեց։ Այժմ գլխավոր դատախազի պարտականությունները ժամանակավորապես դրված են դատախազի՝ տարիքով ավագ տեղակալ Արմեն Հարությունյանի վրա։ Իսկ իշխանության կուլիսներում գզվռտոցը դատախազի պաշտոնի համար շարունակվում է: ԱԱԾ երիտասարդ պետ Գեորգի Կուտոյանն ամեն ինչ անում է, որ գլխավոր դատախազ դառնա Հրաչ Բադալյանի փոխարեն դատախազի տեղակալ նշանակված Արթուր Դավթյանը: Վերջինս մասնագիտական առաջխաղացման համար պարտական է Կոստանյանին, համակարգում համարվել է նրա յուրայինը` Շենգավիթի դատախազից հասնելով քաղաքի դատախազի, ապա գլխավոր դատախազի տեղակալի պաշտոնի: Դատախազության մեր աղբյուրները հայտնում են, որ, առերեւույթ լինելով Կոստանյանի մտերիմը, Արթուր Դավթյանը հավատարիմ է եղել նաեւ Գեորգի Կուտոյանին:

Այժմ ԱԱԾ պետը ցանկանում է դատախազի իր թեկնածուին տեսնել պաշտոնին, քանի որ այդ դեպքում ինքը կդառնա իրավապահ համակարգի «ասիչը»: Դատախազ դառնալու հավակնություններ ունի նաեւ Հատուկ քննչական ծառայության պետ Վահրամ Շահինյանը: Նրա մերձավորներն զբաղված են նրա «լոբբինգով»: Սակայն իրավապահ համակարգի երիտասարդ թեւի համար Շահինյանի թեկնածությունը խիստ անցանկալի է, նրանք երիտասարդ կադր են ուզում, որին կառավարելը հեշտ կլինի: Դատախազի հավանական թեկնածու է դիտարկվում նաեւ նախագահի օգնական Հրայր Ղուկասյանը։ Նա երիտասարդների թեւից է, սակայն փորձ չունի։

Իսկ թե ինչ է լինում, երբ ուժային կառույցում դրսից նման «տեսաբան» են բերում, արդեն ականատես եղանք ԱԱԾ պետ Գեորգի Կուտոյանի օրինակով: Նշենք, որ դատախազի պաշտոնից «առողջական» խնդիրների պատճառով հրաժարական տված Կոստանյանը ցանկություն է հայտնել աշխատել Վրաստանում ՀՀ դեսպան: Վերջին անգամ Կոստանյանը երեւացել է սեպտեմբերի 1-ին՝ իր զավակներին «Այբ» դպրոց տանելու օրը, երբ կարճ հարցազրույց է տվել, թե ինչու է ընտրել «Այբը»: Ասում են` նախկինում գլխավոր դատախազի զավակները Չեխովի անվան դպրոցն էին հաճախում, փաստորեն, աշխատանքից ազատվելուց հետո նրա գործերը լավացել են՝ բարձր վարձավճարով կրթօջախ է ընտրել: