Հայկական «ամազոնուհիներ» - կառավարության հաջողության ինդիկատորը

Լրագիր / Սերժ Սարգսյանը հայտարարեց, որ գոհ է կառավարության քաղաքականությունից: Կառավարությունն ինքն էլ հայտարարում է հաջողությունների մասին, բայց ամեն անգամ վերապահում է ունենում, որ բնակչությունը արդյունքները կզգա մի քանի տարի անց:
Ինչը կարող է լինել կառավարության աշխատանքի հաջողության ինդիկատոր: Հայկական մամուլում պարբերաբար հայտնվում են ռեպորտաժներ բնակավայրերից, որտեղ չի մնացել տղամարդ բնակչություն: Կառավարության «հաջող» քաղաքականության հետեւանքով այդ բնակավայրերի տղամարդ բնակչությունը ստիպված է հեռանալ Ռուսաստանում աշխատելու, ինչը բերել է ծանր ժողովրդագրական պատկերի:
Կան գյուղեր, որտեղ մահացածներին նույնիսկ կանայք են հուղարկավորում, քանի որ գյուղում տղամարդ չի մնացել: Այդ կանայք մեծացնում են երեխաներին, որոնք նույնպես ստիպված են ընդհատել ուսումը, որպեսզի գնան արտագնա աշխատանքի: Նրանք հողն են մշակում, անասուն են պահում: Այդպես լինում է պատերազմի ժամանակ, երբ տղամարդիկ ճակատում են, իսկ կանանց մնում է պահել թիկունքը:
Հայաստանում իսկական սոցիալ-տնտեսական պատերազմ է սեփական ժողովրդի դեմ: Այդ պատերազմի զոհ են դառնում առաջին հերթին կանայք եւ երեխաները, որոնց ընտանիքները բաժանված են, նրանք ապրում են դրամական մի փոխանցումից մյուսը, որպեսզի մարեն պարտքերը եւ վերցնեն նորերը:
Այդ գյուղերը կարող են դառնալ կառավարության հաջողության ինդիկատոր: Երբ այնտեղ վերադառնան տղամարդիկ, երբ նրանց մոտ առաջանա սեփական հողում աշխատելու խթան, եւ կանայք կարողանան զբաղվել կանացի գործերով, այդ ժամանակ Սերժ Սարգսյանը կարող է հայտարարել կառավարության հաջողության մասին:
Իսկ առայժմ հայկական գյուղերում փակ դարպասներ են, «հայկական ամազոնուհիները», գյուղերում ամիսներով ապրելով առանց տղամարդկանց՝ կառավարության գործունեության կենդանի դատավճիռն են: