Աշխարհի «ամենազորեղ» անձնագրերը

Ամերիկյան խորհրդատվական Arton Capital ընկերությունը թարմացրել է աշխարհի «ամենազորեղ» անձնագրերի վարկանիշային ցանկը, իսկ Visual Capitalist պարբերականը ներկայացրել է այդ ցանկում ներառված տվյալներն ինֆոգրաֆիկայի տեսքով: Որքան ազատ՝ առանց վիզայի, կարող է տեղաշարժվել անձնագրի սեփականատերն աշխարհում, այնքան «զորեղ» է այդ անձնագիրը:

Ինդեքսի համաձայն 2017թ. աշխարհում «ամենազորեղ» անձնագրերով կարող են հպարտանալ Գերմանիայի և Սինգապուրի քաղաքացիները: Այս երանելի փաստաթղթերը հնարավորություն են տալիս այս երկրների քաղաքացիներին ազատ, առանց որևէ խնդիրների և ժամանակի կորստի հատել աշխարհի 159 երկրների սահմանը: Այլ արևմտաեվրոպական երկրների մեծ մասի անձնագրերը ևս իրենց սեփականատերերին հնարավորություն են ընձեռում ավելի քան 150 երկիր ազատորեն այցելել:

Հայաստանի Հանրապետության անձնագրի վարկանիշը 59 է, հետևաբար ՀՀ քաղաքացիները կարող են առանց վիզա ստանալու ճանապարհորդել դեպի 59 երկիր:

Էապես տարբեր է ասիական երկրներից շատերի քաղաքացիների վիճակն այս առումով: Սինգապուրից, Ճապոնիայից, Հարավային Կորեայից և Մալազիայից հետո կտրուկ նվազում է այն երկրների քանակը, ուր ասիական անձնագրեր ունեցող քաղաքացիները կարող են այցելել առանց վիզա ստանալու: Ամենադժվարին իրավիճակում են հայտնվել Մերձավոր Արևելքի երկրների բնակիչները: Օրինակ՝ Իրաքի քաղաքացիները կարող են առանց վիզայի այցելել ընդամենը 26 երկիր, Պակիստանի քաղաքացիները՝ 25 երկիր, Աֆղանստանի քաղաքացիները՝ 22: