Ներիշխանական հաշտությունը չեղարկվո՞ւմ է, թե՞ անցնում պլան Բ-ի

1in.am-ը գրում է․

Մամուլում տեղեկություններ են հայտնվել, որ Գագիկ Ծառուկյանը կարող է դե ֆակտո կամ դե յուրե վերադառնալ ԲՀԿ և գլխավորել այդ կուսակցությունը, որը թողել էր Սերժ Սարգսյանի՝ 2015 թվականի փետրվարյան հայտնի ելույթից հետո: Գագիկ Ծաուկյանի վերադարձի մասին խոսակցությունները նոր չեն, դրանք եղել են նույնիսկ հեռանալուց կամ հեռացվելուց անմիջապես հետո:

2015 թվականի փետրվարից հետո Գագիկ Ծառուկյանի և Սերժ Սարգսյանի հարաբերությունները ջերմացան, թեև տրամաբանությունը հուշում էր հակառակը՝ Ծառուկյանը պետք է որ չներեր Սերժ Սարգսյանին այն հրապարակային հարվածի համար, որ թե՛ քաղաքական և թե՛ անգամ բարոյահոգեբանական առումով հասցվեց Ծառուկյանին:

Սակայն սրան զուգահեռ՝ Սերժ Սարգսյանը գուցեև Ծառուկյանին ժամանակին հեռացրեց խաղից, այլապես կարող էին լինել առավել ծանր հարվածներ, երբ ներհամակարգային բախումը սրվեր արդեն առավել լուրջ աստիճանով: Իսկ սա նշանակում է, որ ԲՀԿ նախկին նախագահը կարող է և անգամ երախտապարտ լինել Սերժ Սարգսյանին:

Եվ չի բացառվում, որ այս ամենը նաև քննարկվել է Հովիկ Աբրահամյանի տանը, որտեղ փետրվարի 16-ին տեղի ունեցավ հաշտության հայտնի «խորհրդավոր հավաքը»՝ ՀՅԴ-ի և «Տաշիր գրուպի» սեփականատեր, միլիարդատեր Սամվել Կարապետյանի միջնորդություններով:

Եվ այս առումով հարցն այն է, թե արդյո՞ք ադ հավաքի ընթացքում ձեռք բերելով հետագա պայմանավորվածությունները խաղի կանոնների վերաբերյալ՝ հավաքի մասնակիցները մշակել կամ համաձայնեցրել են նաև սցենարներ, որոնց դեպքում հավանական կամ թույլատրելի է Գագիկ Ծառուկյանի վերադարձը:

Այլ կերպ ասած՝ այդ վերադարձը կլինի Հովիկ Աբրահամյանի տանը հաշտության գործընթացում ձեռք բերված պայմանավորվածությունների սցենարային տարբերակներից մե՞կը, թե՞ կլինի այդ պայմանավորվածությունների խախտում: Ընդ որում, սա դեռ ընդհանրական հարցադրումն է, որովհետև կան նաև որոշակի մանրամասն «ճյուղավորումներ»: Եթե դա խախտում է, ապա համընդհանո՞ւր բնույթի, թե՞, այդուհանդերձ, հաշտության գործընթացի մասնակիցներից մի մասի համար այդ խախտումը կարող է և անակնկալ չլինել: Օրինակ՝ հենց նույն Սերժ Սարգսյանի կամ Հովիկ Աբրահամյանի:

Ակնհայտ է, որ այդ հաշտության գործընթացում նրանք են առանցքային բևեռները, և ակնհայտ է նաև, որ Գագիկ Ծառուկյանը խաղի մեջ կարող է լինել կա՛մ մեկ, կա՛մ մյուս կողմից, իսկ ահա հավասարապես կամ մեկտեղ տարբերակը գործնականում բացառվում է, քանի դեռ Հովիկ Աբրահամյանն ու Սերժ Սարգսյանը հանդիսանում են վարչապետի պաշտոնի հիմնական երկու իշխանական հավակնորդները:

Այն, որ Ծառուկյանը լինելու է խաղի մեջ՝ ԲՀԿ-ով, թե առանց ԲՀԿ-ի, կասկածից վեր է՝ այն պարզ տրամաբանությամբ, որ նման ֆինանսական ռեսուրսների տեր մարդը չի կարող խաղից դուրս լինել: Տվյալ պարագայում հարցը խաղընկերն է կամ թիմը, որի կազմում խաղալու է Ծառուկյանը: