Իրանի նախագահը հայտարարել է, որ 12-օրյա պատերազմի ընթացքում Իսրայելը չի հասել իր նպատակներին
Աշխարհ
Իրանի նախագահ Մասուդ Փեզեշքիանը հանդես է եկել ուղերձով՝ Իրանի և Իսրայելի միջև 12-օրյա պատերազմի մեկնարկի առաջին տարելիցի առթիվ՝ հարգանքի տուրք մատուցելով հակամարտության ընթացքում զոհվածների հիշատակին, հաղորդում է Mehr-ը։
Իր ուղերձում Փեզեշքիանը հայտարարել է, որ Իսրայելի ղեկավարությունը հույս ուներ թուլացնել Իրանին՝ հարվածներ հասցնելով ռազմական հրամանատարներին, միջուկային ոլորտի առաջատար մասնագետներին, ենթակառուցվածքային օբյեկտներին և երկրի բնակելի շրջաններին։ Ըստ նրա, այդ նպատակներին հասնել չի հաջողվել՝ զինված ուժերի գործողությունների, երկրի ղեկավարության որոշումների և բնակչության աջակցության շնորհիվ։
Իրանի նախագահը 12-օրյա պատերազմի իրադարձություններն անվանել է ազգային միասնության օրինակ՝ նշելով, որ երկրի քաղաքացիները, անկախ քաղաքական հայացքներից, հակամարտության ընթացքում հանդես են եկել ի պաշտպանություն երկրի։
Փեզեշքիանը նաև շնորհակալություն է հայտնել երկրի բնակիչներին՝ տնտեսական դժվարությունների պայմաններում ցուցաբերած համբերության համար։ Նա հայտարարել է, որ կառավարությունը վերջին տարվա ընթացքում աշխատել է ներքին խնդիրների լուծման և առկա սահմանափակումների հետևանքները մեղմելու ուղղությամբ։
Բացի այդ, Իրանի նախագահը ընդգծել է ազգային միասնության պահպանման, պաշտպանական ներուժի ամրապնդման և հանրային զգոնության պահպանման կարևորությունը։ Նրա կարծիքով, այս գործոնները վճռորոշ նշանակություն կունենան ապագա մարտահրավերները հաղթահարելու համար։
Ուղերձի ավարտին Փեզեշքիանը հարգանքի տուրք է մատուցել հակամարտության ընթացքում զոհվածների հիշատակին և վստահություն հայտնել, որ Իրանը կկարողանա շարունակել զարգացումը՝ հենվելով հասարակական համախմբվածության, երիտասարդության ներուժի և երկրի առկա ռեսուրսների վրա։
1
2
3
4
5
2
3
4
5
1
3
4
5
