«Ես չեմ հանդուրժի». Անի Զախարյանը դատապարտվեց ազատազրկման

Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Արշակ Վարդանյանի նախագահությամբ, այսօր 1 տարի 6 ամիս ժամկետով ազատազրկման դատապարտեց «Նոր քաղաքական մշակույթ» կուսակցության նախագահ Անի Զախարյանին, սակայն նրա նկատմամբ ազատազրկման ձևով պատիժը պայմանականորեն չկիրառեց և սահմանեց փորձաշրջան 2 տարի ժամկետով։

Հիշեցնենք, որ Անի Զախարյանը մեղադրվում էր անցած տարի հուլիսի 19-ին Երևանի Խորենացի փողոցում ոստիկանության մեքենայի ապակին կոտրելու հրահանգներ տալու մեջ: Նրան մեղադրանք էր առաջադրվել ՀՀ քրեական օրենսգրքի 38-185-րդ հոդվածի 2-րդ մասի 3-րդ կետով՝ ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Նախորդ դատական նիստին դատախազը պահանջել էր 3 տարվա պայմանական ազատազրկման դատապարտել Անի Զախարյանին: Դատարանը, սակայն, ավելի մեղմ գտնվեց՝ հավանաբար հաշվի առնելով Անի Զախարյանի կարգավիճակը. նա հղի է: Անի Զախարյանը, սակայն, համաձայն չէ դատավճռի հետ՝ համարելով, որ ինքը առնչություն չուներ այդ միջադեպի հետ:

Անի Զախարյանը «Առաջին լրատվական»-ի հետ զրույցում ասաց, որ անպայման բողոքարկելու է այս վճիռը, քանի որ դրանով փորձ է արվում վարկաբեկել իրեն, իր հեղինակությունը, մինչդեռ ինքը Հայաստանի զարգացման, պետականության վերջին տարիների կայացման մեջ բավականին մեծ ներդրում ունի և թույլ չի տա, որ նման վճիռներով հեղինակազրկեն իրեն: «Սա իմ պատվի և հեղինակության հարցն է, որ հաջորդիվ դիմեմ վերաքննիչ, վճռաբեկ, ապա նաև Մարդու իրավունքների եվրոպական դատարան, որտեղից էլ հենց իմ ամբողջ սպասելիքներն են»,- ասաց նա:

Անի Զախարյանը համարում է, որ դատարանը նման վճիռ կայացրեց, քանի որ «համակարգի մեջ է» և չէր կարող դրանից դուրս գործել: