«Ղարաբաղի խաղաղությունը հնարավոր է»․ ամերիկացի համանախագահի ուշագրավ գրառումը

ԵԱՀԿ Մինսկի խմբի ամերիկացի համանախագահ Ջեյմս Ուորլիքը սեպտեմբերի 3-ին գրառում էր արել Թվիթերում. «Լեռնային Ղարաբաղի խաղաղությունը հնարավոր է»:

Ուորլիքի թվիթերյան գրառումները միջնորդական գործունեության անբաժանելի և բավականին նուրբ տողատակերով մասերից են նրա համանախագահության առաջին իսկ օրից: Եվ այս իմաստով գրառումն ինքնին նորություն չէ, սակայն հետաքրքիր է դրա շեշտադրումը: Ուորլիքն ակնարկել է ինչ-որ նոր բանի մասի՞ն, որն էական նշանակություն ունի այդ խաղաղության համար, և որին տեղյակ է ինքը, կամ տեղեկացել է և գրառո՞ւմ արել, թե՞ ամերիկացի համանախագահի գրառումը յուրօրինակ մեսիջ է Լեռնային Ղարաբաղի անկախության 25-ամյակի կապակցությամբ, յուրօրինակ շնորհավորանք կամ ուղերձ, որը հասկանալիորեն քողարկված է խորհրդավոր տողատակերում, քանի որ լինելով միջնորդ՝ Ջեյմս Ուորլիքը ենթակա է բաց տեքստերի որոշակի սահմանափակման: Ի վերջո, նրա թվիթերյան գրառումը հաջորդել է ԼՂՀ Անկախության տոնին՝ սեպտեմբերի 2-ին:

Միևնույն ժամանակ, ամերիկացի համանախագահի գրառումը նախորդում է նաև սեպտեմբերի 8-ին ազդարարված միջոցառմանը՝ Մոսկվայում ԵԱՀԿ Մինսկի խմբի համանախագահների քննարկում-խորհրդակցությանը: Ռուսաստանի ԱԳՆ մամուլի խոսնակ Մարիա Զախարովան հայտարարել է, որ դա Մինսկի խմբի համանախագահների պարբերական հանդիպումներից է, պարբերական խորհրդակցություններից, որ տեղի են ունենում համանախագահ երկրների մայրաքաղաքներում: Այդուամենայնիվ, պետք է արձանագրել, որ մոսկովյան հերթական խորհրդակցությունը տեղի է ունենալու Մեծ քսանյակի պեկինյան գագաթնաժողովից հետո, որի ընթացքում տեղի են ունեցել ուշագրավ հանդիպումներ Օբամա-Պուտին, Էրդողան-Պուտին և այլ ձևաչափերով, որոնցում, անկասկած, եթե չեն քննարկվել Ղարաբաղյան խնդրի հետ կապված հարցեր ուղղակիորեն, ապա անշուշտ շոշափվել են հարցեր, որոնք այս կամ այն կերպ անուղղակի առնչություն և ազդեցություն կարող են ունենալ այդ խնդրի վրա:

Եվ ուրեմն, այս համատեքստում իհարկե հետաքրքրական է, թե պեկինյան գագաթնաժողովի շրջանակներում տեղի ունեցած այդ հանդիպումներն ու քննարկումները ինչ ազդեցություն կարող են թողնել Մինսկի խմբի համանախագահների մոսկովյան խորհրդակցություններում, որտեղ ամենայն հավանականությամբ կքննարկվի Սարգսյան-Ալիև առաջիկա հնարավոր հանդիպման հեռանկարը:

Միաժամանակ ակնհայտ է, որ այդ քննարկումները տեղի են ունենալու Մինսկի խմբի երեք համանախագահների՝ Ֆրանսիայի, ԱՄՆ և Ռուսաստանի միջև հարաբերությունների և խնդիրների շրջանակի համատեքստում, քանի որ ակնհայտ է, որ ինքնին Ղարաբաղյան բանակցությունների բովանդակություն այսօր գոյություն չունի:

Եվ այս համատեքստում առավել քան հետաքրքրական է խաղաղության հնարավորության մասին Ջեյմս Ուորլիքի գրառումը, որը կարծեք թե տողատակում ազդարարում է, որ խաղաղությունը հնարավոր է անգամ այս պայմաններում, այսինքն՝ երբ ըստ էության չկա բանակցային բովանդակություն կամ այսպես ասած «որևէ պլան»: Այսինքն՝ ամերիկացի համանախագահը կարծեք թե ԼՂՀ անկախության տարեդարձի և մոսկովյան խորհրդակցության միջև ազդարարում է, որ կարգավորման այս կամ այն «պլանից» չէ, որ կախված է խաղաղությունը: Իսկ թե ով է վերջին շրջանում ինտենսիվորեն կարգավորման «պլաններ» փորձում առաջ մղել տարբեր անվանումներով՝ երևի թե կարիք չկա հիշեցնելու:

© 1in.am