Թշնամու ջրաղացի «աբառոտը»

«Չորրորդ իշխանություն» /  ՌԴ քաղաքական և ռազմական վերլուծության բաժնի վարիչ, ռազմական փորձագետ Ալեքսանդր Խրամչիխինը հայտարարել է, որ Արցախում պատերազմի վերսկսումն անխուսափելի է, ու նաև կարծիք է հայտնել, որ Ադրբեջանն այս պահին ունի բացարձակ առավելություն՝ օդում, և զգալի առավելություն՝ ցամաքում: «Հայկական կողմն ունի լավ պաշտպանողական դիրքեր, բայց նախորդ տարվա ապրիլին Ադրբեջանը ցույց տվեց, որ կարող է տեղային հաջողությունների հասնել», ասել է նա:

Հայկական կողմի պատասխանն, իհարկե, կլինի միանշանակ՝ «Խրամչիխինը գլուխը պատովն է տվել»: ԼՂՀ նախագահի մամուլի խոսնակը երևի պարզապես կասի, որ Խրամչիխինը գլուխը պատովն է տվել, և վերջ, երիտհանրապետական, բանակում չծառայած չինովնիկները կհայտարարեն, որ Խրամչիխինը գլուխը պատովն է տվել, որովհետև հաշվի չի առել հայ զինվորի մարտական ոգին, ընդդիմադիրները կհայտարարեն, որ Խրամչիխինը գլուխը պատովն է տվել, որովհետև համեմատել է միայն ռազմական տեխնիկան, մինչդեռ հայ գեներալներն իրենց հպարտությամբ, ջիպերի մեծությամբ ու որովայնների տրամագծով չի զիջում ադրբեջանցիներին, և այլն: Մի խոսքով՝ բոլոր պատասխաններն ի վերջո կհանգեն Խրամչիխինի գլխի և պատի առճակատման անխուսափելիությանը:

Իսկ գուցե թշնամու ջրաղացին հիմնական ջուր լցնողն այն գերագույն գլխավոր հրամանատա՞րն է, որի եղբայրների ու փեսայի բիզնեսների տարեկան «աբառոտը» երկրի պաշտպանության բյուջեից մեծ է: