«Եթե մեր աջակցությունը ցանկալի չէ, չենք կարող ստիպել ոչ մի բան ձեր կամքին հակառակ»․ Եվրամիության ապտակը Հայաստանի իշխանությանը

1in.am / Եվրամիությունը պատրաստ է շարունակել աջակցել Հայաստանին, քանի որ տեսնում է քաղաքացիների դրական արձագանքը Հայաստանում անցկացվող ԵՄ գործողություններին: Հունիսի 20-ին լրագրողների հետ զրույցում այս մասին ասաց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:

«Ցանկանում եմ առիթից օգտվել եւ շնորհակալություն հայտնել հայ քաղաքացիներին, ովքեր գնահատում են մեր աշխատանքը, շնորհակալ եմ աջակցության համար: Մենք իսկապես հասկանում ենք, որ շատ մարդիկ կան Հայաստանում, ովքեր հավատում են, որ ԵՄ-ն լավ գործ է անում: Կարող եմ ասել, որ երբեմն բավականին հուզիչ ուղերձներ ենք ստանում քաղաքացիներից, ովքեր առհասարակ մեզ դիմում էին աջակցություն խնդրելու համար, իսկ այժմ նրանք են աջակցություն դրսեւորում: Սա իմ եւ իմ թիմի համար մեծ խթան է: Վստահեցնում եմ՝ պատրաստ ենք առավելագույն ջանքերը գործադրել Հայաստանի քաղաքացիների համար, որպեսզի նրանք մեր գործողություններից ավելի շատ օգուտ ստանան»,- շեշտեց նա:

Անդրադառնալով Հայաստանում ապրիլի 2-ին անցկացված ընտրությունների արդյունքների վերաբերյալ Եվրոպական խորհրդի կազմակերպած քննարկմանը, որտեղ դեսպանը խոսել էր ընտրակաշառքների բաժանման, ընտրական այլ խախտումների մասին, եւ որից հետո ՀՀ արդարադատության նախարարը հայտարարել էր, որ սա փորձ է խառնվելու Հայաստանի ներքին խնդիրներին, Պյոտր Սվիտալսկին նշեց, որ իր ուղերձը հստակորեն տեղ հասցնելու համար հանրային հայտարարությունների կարիք չունի, իր գնահատականն ու կարծիքը անհայտ չէ իր զրուցակիցներին եւ պատասխանատուներին:

«Այստեղ չեմ եկել մասնակցելու հանրային քննարկման, դա իմ դերը չէ, բայց, իհարկե, դրական է, երբ արտաքին դիտորդը ներգրավված է կարեւոր հարցերի վերաբերյալ քննարկումներում: Մենք պետք է դրական տրամադրված լինենք հանրային քննարկումներին եւ բանավեճերին, որոնք ծավալվում են կարեւոր հարցերի շուրջ, սակայն կարեւոր է հետեւել որոշակի տարրական կանոնների. նախքան ինչ-որ բան արտահայտելը, իմացեք՝ ինչ է ասվել, կրկին նայեք տեսանյութը, լսեք ձայնագրությունը, մտածեք, հարգեք ձեր խոսակցին»,-ասաց Պյոտր Սվիտալսկին՝ հավելելով, որ հայ պաշտոնյաների հետ շատ լավ աշխատանքային հարաբերություններ ունի:
Ինչ վերաբերում է ընտրություններին, դեսպանը եւս մեկ անգամ հիշեցրեց, որ Եվրամիությունը մեծապես աջակցել է Հայաստանում խորհրդարանական ընտրությունների անցկացմանը՝ տրամադրելով ավելի քան յոթ մլն եվրո, որի միջոցով է նաեւ հնարավոր եղել կազմակերպել ընտրական ողջ գործընթացը: Նա ընդգծեց, որ դա եղել է Հայաստանի կամքով, ոչ հակառակ դրան:

«Գաղտնիք չէ, որ մեր աջակցությունը ընտրական գործընթացում շատ ավելին էր, քան պարզապես ֆինանսավորումը, տեխնիկական օժանդակությունը: Մենք պատրաստ ենք շարունակել մեր աջակցությունը, բայց եթե կան թերահավատություններ կամ այլ կարծիքներ, որ սա այնքան էլ ցանկալի չէ, մենք մեծապես հարգում ենք Հայաստանի սուվերենությունը: Եթե մեր աջակցությունը ցանկալի չէ, չենք կարող ստիպել ոչ մի բան ձեր կամքին հակառակ»,-եզրափակեց Եվրամիության պատվիրակության ղեկավարը:

***

Հայաստանում Եվրամիության դեսպան Պյոտր Սվիտալսկին հունիսի 20-ին տեղի ունեցած ասուլիսում անդրադարձել է իր վերջին աղմկոտ հայտարարությանը, ավելի շուտ՝ բավականին առօրեական, աշխատանքային հայտարարությանը, որը Հայաստանի իշխանությունը վերածեց աղմուկի: Սվիտալսկին մի քանի օր առաջ հայտարարել էր, որ ընտրական գործընթացում առաջ քայլով հանդերձ՝ այն, իհարկե, ունի կատարելագործման կարիք: Սվիտալսկին մասնավորապես խոսել էր ԿԸՀ արժանահավատության մասին: Նա խորհուրդ էր տվել ԿԸՀ կազմ ներգրավել նաև քաղհասարակության ներկայացուցիչների:

Այդ խորհուրդը Հայաստանի իշխանությունը ընդունեց սվիններով: Ընդամենը մի քանի րոպե անց արդարադատության նախարար Դավիթ Հարությունյանը հայտարարեց, որ դա ներքին գործերին միջամտելու անթույլատրելի քայլ է: Նույնը կրկնեցին նաև ՀՀԿ խոսնակն ու մի քանի այլ ՀՀԿ-ականներ:

Եվ ահա այսօր Պյոտր Սվիտալսկին իր վերաբերմունքն է հայտնել ստեղծված վիճակին, որը կարելի է համարել պարզապես իշխանությանը հասցված ապտակ: Սվիտալսկին հայտարարել է, որ ինքը երբեք իշխանության հետ չի շփվում և իշխանությանը որևէ ազդակ չի հայտնում հրապարակային հայտարարություններով, քանի որ կան այդ ամենն անելու առավել անմիջական շփման խողովակներ, և ինքը բախտ ունի օգտվել այդ խողովակներից, անկեղծ խոսել Հայաստանի իշխանության հետ անմիջականորեն:

Ինչ է դա նշանակում, այսպես ասած, դիվանագիտականից թարգմանած տարբերակում: Առաջին հայացքից Սվիտալսկին հաճոյախոսում է իշխանությանը, որ կա անմիջական շփման հնարավորություն: Իրականում, սակայն, Եվրամիության դեսպանն ըստ էության իշխանությանն ասում է, որ հրապարակավ բանավեճի մեջ չի մտնի և չի պատասխանի, այլ «կխոսի հետո»: «Կխոսենք այլ տեղում, այլ կերպ»՝ ըստ էության ասում է ԵՄ դեսպանը:

Միաժամանակ նա հայտարարել է, որ Եվրամիությունը մեծ աջակցություն է ցուցաբերել ապրիլի 2-ի ընտրական գործընթացի կազմակերպմանը, և շեշտել, որ դա արվել է Հայաստանի իշխանության խնդրանքով: Մենք որևէ դեպքում ոչինչ չենք պարտադրում, և եթե այժմ մեր օգնության կարիքը չկա, ապա մենք, իհարկե, որևէ բան չենք պարտադրի՝ հայտարարել է դեսպանը:

Կրկին, փորձենք «թարգմանել» դիվանագիտական լեզվից: Ստացվում է հերթական ապտակը Հայաստանի իշխանությանը, ընդ որում՝ թե՛ բարոյական՝ ակնարկ այն մասին, որ ֆինանսական աջակցության դեպքում իշխանությունն ինքն է խնդրում միջամտություն, թե՛ քաղաքական՝ այն իմաստով, որ դեսպանն իշխանությանը ակնարկում է՝ «դեռ կխնդրեք Եվրամիության օժանդակություն»: Եվ այստեղ, իհարկե, խոսքը միայն ընտրական գործընթացի օժանդակության մասին չէ, այլ քաղաքական, ավելի լայն խնդիրների և մարտահրավերների ներառում ենթադրող:

Իշխանությանն ուղղված երրորդ ապտակը հնչել է՝ մատնացույց անելով արդեն Հայաստանի ինքնիշխանության սպառնալիքը: Դեսպանը հայտարարել է, որ հայերը շատ լայն մտածող են և լավ են պատկերացնում, որ ինքնիշխանության սպառնալիքները բոլորովին այլ տեղ են, քան Եվրամիության հետ գործընկերությունը: Թե որտեղ է ինքնիշխանության սպառնալիքը՝ թե՛ ԱՄՆ, թե՛ Եվրամիության դեսպանները Հայաստանում խոսել են բազմաթիվ անգամ՝ ասելով, որ Հայաստանում կոռուպցիայի բարձր աստիճանը սպառնում է արդեն Հայաստանի ազգային անվտանգությանն ու մեծացնում երկրի կառավարման գործում արտաքին միջամտության վտանգը:

Այլ կերպ ասած՝ Հայաստանին ակնարկվում է ռուսական գերազդեցությունը Հայաստանի պետական քաղաքականության մշակման և իրացման հարցում: Մի բան, որի անունը, սակայն, Հայաստանի իշխանությունը ոչ թե դնում է «ներքին գործերին միջամտություն», այլ «ռազմավարական դաշնակցություն»: