Կանևսկոյի բանդային ցմահ ազատազրկում է սպառնում

1in.am / Կրասնոդարի շրջանային դատարանում մեղադրող դատախազ Սվետլանա Նեկոզը հունիսի 13-ին՝ հերթական նիստի ժամանակ, ցմահ ազատազրկում է պահանջել «օրենքով գող» Արմեն Հարությունյանի՝ քրեական աշխարհում ավելի հայտնի Արմեն Կանևսկոյի հանցավոր բանդայի չորս անդամներից երկուսի համար:

Մեղադրական ճառում դատախազն ասել է, որ մեղադրյալներ Օլեգ Վանչենկոյին, Էռնեստ Լալաբեկովին, Մանուկ Թորոսյանին և Ալեքսանդր Ժիգալկովին պետք է մեկուսացնել հասարակությունից՝ երկար ժամանակով:

Վերջիններիս գործողությունները, ՌԴ Քրեական օրենսգրքի 206 հոդվածի համաձայն, որակվել է բանդիտիզմ, շորթում, որը կատարվել է կազմակերպված խմբի կողմից, ինչպես նաև ծանր մարմնական վնաս տուժողի առողջությանը, երկու կամ ավելի անձանց սպանություն և զենք-զինամթերքի անօրինական շրջանառություն:

Դատախազը Օլեգ Վանչենկոյի և Էռնեստ Լալաբեկովի համար դատարանից պահանջել ցմահ բանտարկություն, իսկ Մանուկ Թորոսյանի և Ալեքսանդր Ժիգալկովի համար՝ համապատասխանաբար 13 և 11 տարի ազատազրկում:

Մեղադրանքի համաձայն ՝ Արմեն Կանևսկոն 2006 թ. «Նովոկուբանսկոյե» ՓԲԸ կոնյակի գործարանի հայազգի համասեփականատեր Սուրեն Եղիազարովին առաջարկել է իր հովանավորությունը և դրա դիմաց պահանջել ամսական 30 000 դոլար գումար: Գործարարը մի անգամ «մուծվել է» բանդային, ապա հրաժարվել:

2007 թվականի հունվարի 30-ին՝ օրը ցերեկով, Կուբանի Կրասնաարմեյսկի շրջանում գտնվող «Ույուտ» սրճարանի մոտ Կանևսկոյի բանդայի անդամները բացահայտ գնդակահարել են Եղիազարովին ու նրա երկու ուղեկիցներին, ապա սպանվածների մարմինները թաքցրել:

Գործի հետաքննությամբ պարզվել է նաև, որ Արմեն Կանևսկոյի բանդայի զոհն է դարձել նույն սրճարանի սեփականատեր Սերգեյ Խաչատրյանը, որը, հանցագործների կարծիքով, համարվել է դեպքի ականատես: Կանևսկոն հրամայել է վերացնել Խաչատրյանին: Նրա մարմինը գտել են գլխի շրջանում հրազենային վնասվածքներով 2015 թվականին՝ Կանևսկոյին վերագրվող կղմինդրի գործարանի բակում փորված բետոնապատ փոսից:

2010 թ. Արմեն Կանևսկոն այլ գործի շրջանակներում դատապարտվել է ծանր հանցագործության համար: Նույն թվականի դեկտեմբերի նա մահացել է աստրախանյան կալանավայրի հիվանդանոցում: Նրա մահվան դեպքի առթիվ հարուցված քրեական գործը կասեցվել է:

Արմեն Հարությունյանի բանդան ստեղծվել է 90-ականների վերջին, և եղբոր մահից հետո այն ղեկավարում է Արտյոմ Կանևսկոն, որի անունը վերջերս շրջանառվում է Դոն Պիպոյի սպանությունը նախապատրաստելու պատվերի մեջ: