Սաքունցին սպանելու սպառնալիքների հատկանիշներով հարուցվել է քրեական գործ
Հասարակություն
Թերթ / Իրավապաշտպան Արթուր Սաքունցին կյանքից զրկելու սպառնալիքների հատկանիշներով Քրեական օրենսգրքի 137 հոդվածի առաջին մասով հարուցվել է քրեական գործ. այսօր Մեդիա կենտրոնում այս թեմայով հրավիրված ասուլիսին տեղեկացրեց ՀՀ Գլխավոր Դատախազության Կարևոր գործերով քննությանն վարչության պետի տեղակալ Անդրանիկ Հակոբյանը:
«Որոշում է կայացվել Արթուր Սաքունցին տուժող ճանաչելու մասին և կատարվել է հարցաքննություն: Քրեական գործը պետք է ուղարկվի Քննչական կոմիտե նախաքննություն կատարելու համար»,-ասաց նա:
Վանաձորի ՀՔԱ գրասենյակի ղեկավար Արթուր Սաքունցն ասաց, որ թեև ի սկզբանե ոստիկանություն չեն դիմել, այլ դատախազություն, բայց գործը փոխանցվել է ոստիկանությանը: Սաքունցը նշեց, որ լրացուցիչ բացատրություն է այսօր ներկայացրել իրեն հայտնի հանգամանքների վերաբերյալ:
ՄԻՊ աշխատակազմի ղեկավարի տեղակալ Վլադիմիր Հովհաննիսյանն իր մտահոգությունը հայտնեց նման սպառնալիքների մասով և տեղեկացրեց, որ ՄԻՊ-ում նախաձեռնվել է քննարկման ընթացակարգ և իրավապահ մարմիներին հասցեագրվելու են համապատասխան հարցումներ:
«Այս գործն ամբողջությամբ գտնվելու է ՄԻՊ մշտական հսկողության ներքո: Այս պահին կարող եմ նշել, որ ՄԻՊ-ի հստակ դիրքորոշումը կա մամուլով տարածված, որտեղ խիստ քննադատության է ենթարկվում նման երևույթի ցանկացած դրսևորում: Այս պահին արդեն գրություն է հասցեագրվել իրավապահ մարմիններին, որպեսզի հնարավորինս տեղեկություն ստացվի»,- ասաց նա:
Հայաստանի Հելսինկյան կոմիտեի նախագահ Ավետիք Իշխանյանը իրավապահների և լրագրողների նկատմամբ սպառնալիքների դեպքերին անդրադարձավ և նախ խոսեց հասարակության սպառնալիքների ընկալման մասին: Ըստ նրա՝ դեռևս հանրային կյանքի տարբեր ոլորտներում հասարակությունն իրեն ագրեսիվ է դրսևորում։
«Այն որ հորիզոնական հարթությունում հարաբերություններն այնպիսին են, թե «քեզ գիտես ես ինչ կանեմ», «գիտես ես ով եմ», բայց եթե դրանք թողենք և վերցնենք մարդու իրավունքների տեսանկյունից պետական կառույցների ու պաշտոնյանների սպառնալիքներին, ապա բազմիցս ենք լսել,թե մեզ հայտնի պաշտոնյաները, պատգամավորները լրագրողներին ասել են «գլուխդ կպոկեմ»,-ասաց նա:
Ավետիք Իշխանյանը նշեց, թե այս տեսանկյունից Արթուր Սաքունցը շատ հետևողական է ի տարբերություն իրենց կազմակերպության, քանի որ կոնկրետ ինքը չի հավատում իրավապահ մարմիներին: Իշխանյանը մի քանի օրինակներ նշելուց հետո նկատեց, թե որևէ դեպքում որևէ մեկը չպատժվեց, ընդ որում, երբ անձնական հարց էլ չի լինում, այլ ընդամենը իշխանության հասցեին սուր քննադատություն է:
«Թող ապացուցեն, որ Սաքունցի նկատմամբ սպառնալիքը հորզիոնական հարթության է եղել, որ ինչ-որ մեկը չափազանց պետականամետ է եղել և իրեն դուր չի եկել և Սաքունցի նկատմամբ այդպիսի բաներ է գրել: Ես չեմ հավատում, չեմ բացառում, որ ինքնություն գործած լինի, բայց որ իշխանության խմբավորման ներքո գործող անհատ է, դա ակնհայտ է»,- ասաց Ավետիք Իշխանյանը:
ՀԿ նախագահը շարունակեց, թե գուցե հրահանգված է եղել, բայց եթե չի էլ եղել, ապա դա հետագա պաշտոն ստանալու գրավական է, թե ինչ լավ է ծառայում: «Կապացուցեն՝ ինչն է դրդապատճառը, ես ներողություն կխնդրեմ, եթե հայտնաբերվի էլ, կարծում եմ՝ ձևական պատիժ կկրի»,- ասաց նա:
«Իրավունքների պաշտպանություն առանց սահմանների» ՀԿ-ի ղեկավար Հայկուհի Հարությունյանն էլ նշեց, թե սա անհանդուրժողականության հերթական դրսևորումներից է: Իսկ իշխանության կողմից որևէ զսպող դերակատարում չի դրսևորվում:
1
2
3
4
5
2
3
4
5
3
