Լսել են, բայց ասելու բան չունեն. հերթական սկանդալն ու հայկական կողմի անգործությունը

Վրաստանում ընթացող վրացի լեգենդար ըմբիշներ Վախթանգ Բալավաձեի և Գիվի Կարտոզիայի անվան մրցաշարում հունիսի 10-ին Արթուր Ալեքսանյանի մասնակցությամբ եզրափակիչն ավարտվել էր սկանդալով:

98 կգ քաշային կարգի եզրափակիչ գոտեմարտում Ռիոյի օլիմպիական խաղերի չեմպիոն Արթուր Ալեքսանյանը մրցել է վրաց ըմբիշ Ռևազ Նադարեիշվիլու հետ։ Ըմբշամարտի միջազգային ֆեդերացիայի ազգությամբ թուրք օլիմպիական մրցավարն ամեն կերպ խոչընդոտել է մեր մարզիկի հաղթանակը, հայ երկրպագուներն էլ, չդիմանալով վրաց ըմբիշի օգտին կողմնական վերաբերմունքին, աղմուկ են բարձրացրել, ինչին էլ հաջորդել է հայերի և վրացիների միջև քաշքշուքը: Բախմանը խոչընդոտել է նաև Արթուր Ալեքսանյանը: Մրցագորգից դուրս գալու համար մեր մարզիկին որակազրկել են:

Վրաստանում բողոքարկելու հնարավորություն հայկական կողմին չեն տվել, մնում է հասկանալ՝ հայկական իշխանություններն, ի պաշտպանություն մեր մարզիկի, որևէ քայլ կանե՞ն, թե, ինչպես միշտ, շառից ու փորձանքից հեռու տարբերակը կնախընտրեն:

Վրաստանում Հայաստանի դեսպանատնում լսել են, տեղյակ են, բայց ասելու ոչինչ չունեն:

«Հայաստանի դեսպանատունն այս հարցի վերաբերյալ իրավասու չէ մեկնաբանություն տալ: Մենք, եթե մեկնաբանություն ենք ունենում, տալիս ենք ՀՀ արտաքին գործերի նախարարությանը, իրենք են հրապարակում»,- այսպիսի մեկնաբանություն NewsBook-ին տվեց Վրաստանում Հայաստանի արտակարգ և լիազոր դեսպան Յուրի Վարդանյանի օգնականը՝ Անի Հայրապետյանը:

Կատարվածի վերաբերյալ ասելու ոչինչ չունի նաև ՀՀ սպորտի և երիտասարդության հարցերի նախարարությունը:

«Մեկնաբանելու բան չկա»,- ասացին նախարարության լրատվության ծառայությունից:

Ըմբշամարտի Հայաստանի ֆեդերացիայի մամուլի խոսնակ Կարեն Գիլոյանն էլ մեզ հետ զրույցում նշեց, որ թիմը նոր է վերադարձել Հայաստան, դեռ չեն որոշվել հետագա քայլերը:

«Այսօր կամ վաղը կհրավիրվի խորհրդի նիստ և կկայացվի որոշում՝ հետագա քայլերի հետ կապված: Առայժմ որևէ որոշում կայացված չէ»,- փոխանցեց Կարեն Գիլոյանը:

Հ.Գ. Աշխարհի տարբեր մրցաշարերում հայ մարզիկների նկատմամբ նման դիրքորոշումն ու հայկական կողմից անգործությունը ոչ ոքի համար անակնկալ չէ: Վստահ ենք՝ բոլորը կհիշեն, որ հունահռոմեական ըմբշամարտի 66 կգ քաշային կարգի եզրափակչում Եվրոպական խաղերի փոխչեմպիոն Միհրան Հարությունյանը կողմնակալ մրցավարության և անարդարության պատճառով Ամառային օլիմպիական խաղերում «պարտվեց» սերբ Դավոր Ստեֆանեկին և զրկվեց ոսկե մեդալից: Նույն իրավիճակն էր նաև Բաքվում տեղի ունեցած եվրոպական խաղերի ժամանակ. մրցավարական մեծ խախտումներով Միհրան Հարությունյանին էլի արծաթը հասավ: Պատկերը ոչնչով չի տարբերվում նաև Լաս Վեգասում՝ աշխարհի առաջնության ժամանակ. մեր մարզիկն այնտեղ ևս անարդար կերպով զրկվեց մեդալից: Այս իրավիճակը կշարունակվի և մեր մարզիկները կզրկվեն իրենց արժանի մրցանակներից, եթե բոլոր պատկան մարմինները շարունակեն «մեր գործը չի», «ոչինչ ասել չենք կարող», «մյուս կառույցին զանգեք» ծամծմված ու «ցրող» քաղաքականությունը վարել:

Նյութի աղբյուրը ` http://newsbook.am/?108087&l=am/