Քուրդ զինյալները ահաբեկչական հարձակում են իրականացրել Սասունում

Այսօրվա Թուրքիայի տարածքում գտնվող Բաթման նահանգի Քոզլուք/Հազզո շրջանում (պատմական Սասունի մի հատվածը- tert.am) «Քուրդիստանի աշխատավորական կուսակցություն» խմբավորման զինյալները ահաբեկչական հարձակում են իրականացրել՝ ինքնաշեն պայթուցիկի միջոցով մեքենա պայթեցնելով, այս մասին հայտնում է թուրքական «Բաթման հաբեր» պարբերականը:

Մեքենայի պայթյունի հետևանքով մահացել է 22-ամյա երիտասարդ ուսուցչուհի Շենայ Այբուքե Յալչընը, ով պատահաբար անցնելիս է եղել դեպքի վայրի մոտով: Հայտնի է, որ ահաբեկիչների թիրախ դարձած մեքենան պատկանել է Քոզլուքի շրջկենտրոնի ղեկավարի զարմիկին:

Ուսուցչուհի Շենայ Այբուքե Յալչընը 8 ամիս առաջ էր տեղափոխվել Քոզլուք՝ իր աշխատանքային պարտկանությունները կատարելու: Լրատվամիջոցները հայտնում են, որ 22-ամյա ուսուցչուհին մահացել է որպես ուսուցիչ իր անցկացրած առաջին ուսումնական տարվա վերջին օրը՝ աշակերտներին հրաժեշտ տալուց հետո:

Պայթյունի հետևանքով նաև վիրավորվել է 4 մարդ, որոնցից երկուսը զինվորական են:

Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թվականին հիմնադրել է Աբդուլլահ Օջալանը: