Լեսբուհի աղջիկները Հայաստանում կրկնակի խտրականության են ենթարկվում

«ՀԺ» / Երբ չորս տարի առաջ երիտասարդները պայքարում էին տրանսպորտի ուղեվարձի թանկացման դեմ, այն ժամանակ Խորհրդարանի ղեկավար Գալուստ Սահակյանը երիտասարդներին հորդորեց պայքարել սեռական փոքրամասնությունների դեմ եւ ժողովրդին ավելի մեծ օգուտ տալ, այդ կերպ ի ցույց դնելով երկրի առաջին դեմքերի վերաբերմունքը այդ անձանց նկատմամբ՝ մոռանալով բոլոր համաձայնագրերն ու պարտավորությունները, որոնք երկիրը տարիներ շարունակ վավերացնում է։

Ու թեեւ, ինչպես պետական այրերն, այնպես էլ հասարակության մեջ շատերը շարունակում են կարծել, թե պետք է «ոչնչացնել, բուժել, վառել, ճնշել սեռական փոքրամասնություններին», այնուամենայնիվ ԼԳԲՏԻ (Լեսբուհի, Գեյ, Բիսեքսուալ, Տրանսգենդեր, Ինտերսեքս) համայնքի ներկայացուցիչները՝ ճեղքում են խտրականության ու արհամարհանքի պատնեշներն ու շարունակում հավատարիմ մնալ իրենց անձի ինքնությանը։

Ըստ միջազգային ցուցանիշների՝ ԼԳԲՏԻ անձանց թիվը բոլոր հասարակություններում տատանվում է ընդհանուր բնակչության 3-5%-ի շրջանակներում:

«Խթանելով գենդերային հավասարությունը Հայաստանում» ծրագրի շրջանակում անցկացված քննարկման ժամանակ ԼԳԲՏԻ անձանց խնդիրներով զբաղվող «Հանրային տեղեկատվություն եւ գիտելիքի կարիք» (PINK Armenia) հասարակական կազմակերպության նախագահ Նվարդ Մարգարյանն ասում է, որ ՀՀ-ն ստորագրել եւ վավերացրել է ՄԱԿ-ի, ԵԽ-ի, ԵԱՀԿ-ի եւ ԵՄ-ի մի շարք դաշնագրեր, պայմանագրեր եւ իրավական այլ փաստաթղթեր, սակայն գործնականում չի իրականացրել ստանձնած այդ պարտավորությունները սեռական կողմնորոշմանն ու գենդերային ինքնությանն առնչվող հարցերի տեսանկյունից։ Այս ամենի հետեւանքով հոմոֆոբիան համատարած եւ խորապես արմատացած երեւույթ է հայ հասարակության մեջ։

հաջորդիվ՝ այստեղ