Ավտոբուսում վթարված երեխաները գնացել էին ծնունդի․ մանրամասներ դեպքից

Երեկ երեկոյան ավտոբուսի կողաշրջվելուց տուժածներից միայն մի երեխան է այս պահին հիվանդանոցում, մյուսները ստացել են բուժօգնություն և դուրս գրվել։ Այս մասին armtimes.com-ին տեղեկացրին «Հերացի» թիվ 1 հիվանդանոցային համալիրից և «Սուրբ Աստվածամայր» ԲԿ-ից, որտեղ էլ տեղափոխվել էին տուժածները։

Հիշեցնենք, որ երեկ երեկոյան Երևան քաղաքի Ազատության պողոտայում՝ Լամբադա կամրջի մոտ, կողաշրջվել էր թիվ 23 երթուղու «Իսուզու» մակնիշի 1881 Տ պետհամարանիշի ավտոբուսը, որի հետևանքով ութ տուժածները, որոնցից երեքն անչափահաս, տեղափոխվել էին հիվանդանոցներ։

«Հերացի» թիվ 1 հիվանդանոցային համալիրից ասացին, որ իրենց մոտ տեղափոխած բոլոր տուժածները՝ այդ թվում նաև ավտոբուսի վարորդը, ստացել են համապատասխան բուժօգնություն և դուրս են գրվել։

Իսկ «Սուրբ Աստվածամայր» ԲԿ-ից էլ տեղեկացրին, որ միայն մի երեխա է իրենց մոտ գտնվում։

«Երեք երեխա է տեղափոխվել մեզ մոտ, երկուսն արդեն գնացել են տուն, միայն մեկն է հիմա մեզ մոտ՝ 12-ամյա Գևորգ Խալաթյանը, նեյրովիրաբուժական բաժանմունքում է, վիճակը բավարար է, շոկային վիճակ չի եղել, վիճակը նորմալ է»,-տեղեկացրին հիվանդանոցից։

Վթարից տուժած երեխաները՝ այդ թվում Գևորգը, իրար բարեկամներ են և ծնունդի էին գնացել։

«Բոլոր տուժած երեխեքն էլ մերն են եղել, բոլորն էլ մայրիկների հետ են եղել, գնացել էին երեխաներից մեկի ծնունդին՝ Մոնումենտ, հետ վերադառնալուց եղել է դեպքը, բայց հիմա բոլորի վիճակը լավ է, միայն Գևորգն է դեռ հիվանդանոցում, բայց վիճակը նորմալ է, կայուն է։ Թե ինչպես է եղել դեպքը, չգիտեմ, բայց ժողովուրդն ասում են, որ նորմալ վարորդ է եղել, դե վատացել է, բոլորի հետ էլ կարող է լինել»,-ասաց երեխաների հարազատներից մեկը։

Հիշեցնենք, որ Երևան քաղաքի տրանսպորտի և կապի վարչության պետ Հենրիկ Նավասարդյանը տեղեկացրել էր, որ մեքենան սարքին է եղել, չի եղել ծանրաբեռնված, իսկ 60-ամյա վարորդն առավոտյան անցել է բուժզննում, սակայն, ըստ նախնական տեղեկությունների՝ դեպքի ժամանակ վատացել է ինքնազգացողությունը։

Ոստիկանությունից տեղեկացնում են, որ դեպքի առթիվ կատարվում է հետաքննություն: