Չցանկանալով բաժանվել կնոջից, դաժան ծեծի է ենթարկել աներոջը

Աջափնյակ և Դավթաշեն վարչական շրջանների ընդհանուր իրավասության դատարանում Արմեն Խաչատրյանի նախագահությամբ ավարտվեց Էդգար Ա.-ի գործի դատական քննությունը:

37-ամյա Էդգարին մեղադրանք էր առաջադրված աներոջ նկատմամբ բռնություն գործադրելու, նրա առողջությանը թեթև վնաս հասցնելու համար՝ ՀՀ քրեական օրենսգրքի 117 հոդվածով:

Ըստ մեղադրանքի՝ 2016 թվականի ապրիլի 13-ին, ժամը 22-ն անց 30-ի սահմաններում Էդգար Ա.-ն Երևանի Նազարբեկյան թաղամասի շենքերից մեկի մոտ գործով չպարզված անձանց հետ վիճել է իր կնոջ հոր՝ Սեյրան Հ.-ի հետ՝ իր ու կնոջ ամուսնալուծության հարցի շուրջ:

Վեճի ժամանակ Էդգար Ա.-ն ձեռքով հարվածել է աներոջ դեմքին՝ նրան պատճառելով ձախ ակնակապիճի ստորկոպային շրջանի արյունազեղման ձևով թեթև վնաս՝ առողջության կարճատև քայքայումով:

Դատարանում ամբաստանյալ Էդգար Ա.-ն իրեն մեղավոր չի ճանաչել ու հրաժարվել է ցուցմունքներ տալուց: Նախաքննության ընթացքում էլ նա դիրքորոշում չէր հայտնել և ցուցմունք չէր տվել:

Տուժող Սեյրան Հ.-ն հայտնել է, որ ՌԴ քաղաքացի է, մշտապես բնակվում է Ռուսաստանում:

Ավագ դուստրը՝ Ալինան, դեռ 17 տարի առաջ Հայաստանում ամուսնացել էր Էդգար Ա.-ի հետ, համատեղ ամուսնական կյանքի ընթացքում նրանք երկու երեխա ունեն:

Դստեր ու նրա ամուսնու հարաբերությունները մշտապես լարված են եղել, բայց դուստրը երկար ժամանակ համբերել ու չի բաժանվել:

2016 թվականի ապրիլին դուստրը Հայաստանից զանգել է իրեն ու հայտնել է, թե այլևս չի ցանկանում ապրել Էդգարի հետ, պետք է ամուսնալուծվի: Նա խնդրել է իրեն, որ Հայաստան ժամանի՝ օգնելու և ամուսնալուծության հարցի կարգավորման համար:

Ապրիլի 7-ին ինքը կնոջ հետ եկել է Հայաստան: Մինչև իրենց ժամանումը դուստրը ամուսնու տանից միայնակ եկել էր իրենց բնակարան, որը գտնվում է Նազարբեկյան թաղամասում: Նույն օրվա երեկոյան իրենց բնակարան է եկել Էդգարն ու իր հետ վիճել է կնոջ հեռանալու պատճառով:

Ապրիլի 13-ին ինքը կնոջ ու դստեր հետ գնացել է դատարան՝ իմանալու, թե ամուսնալուծության համար ինչ փաստաթղթեր է անհրաժեշտ ներկայացնել:

Նույն օրն իրեն այցելել են իր հորաքրոջ որդին ու մի փաստաբան: Իրենց բնակարանում խորհրդակցել են դստեր ամուսնալուծության հարցով:

Ժամը 22-ն անց 30-ի սահմաններում դուրս են եկել փաստաբանին ճանապարհելու: Նկատել են, որ շենքին են մոտենում Էդգարն ու մի քանի հոգի:

Էդգարի պահանջով ինքը նրա հետ առանձնացել է շենքի կողային հատվածում: Էդգարը սկսել է վիճել իր հետ, պահանջել է չխառնվել ընտանեկան հարցերին ու բռունցքով մեկ հարված է հասցրել իր ձախ աչքին՝ պատճառելով վնասվածք:

Իրեն ու հորաքրոջ որդուն հարվածներ են հասցրել նաև Էդգարի հետի անձինք: Հարվածներ են հասցրել ոտքերով ու ձեռքերով, իրեն հարվածել ու գցել են գետնին:

Աղմուկի վրա հավաքվել են հարևանները, Էդգարն ու նրա հետի տղաները հեռացել են:

Վկա Ալինան հայտնել է, որ 17 տարի ամուսնացած է եղել Էդգարի հետ, հենց սկզբից էլ իրենց հարաբերությունները եղել են լարված, բայց տարիների ընթացքում հակասություններն ավելի են սրվել: Պատճառը եղել է Էդգարի վատ վերաբերմունքն իր նկատմամբ, նրա կողմից իրեն մշտական սահմանափակումների ենթարկելը:

Երբ այլևս չի դիմացել, զանգել է Ռուսաստանում ապրող ծնողներին ու ասել է, որ ամուսնալուծվում է Էդգարից: Ինքը առանց զգուշացնելու հեռացել է Էդգարի տանից, գնացել է ծնողների բնակարան:

Ծնողների ժամանելուց օրեր անց Էդգարը մի քանի հոգու հետ շենքի մոտ հարձակվել ու ծեծել է իր հորն ու հոր հորաքրոջ տղային: Դրանից մի քանի օր հետո ինքը դիմել է դատարան՝ ամուսնալուծության և երեխաների խնամքն իրեն հանձնելու պահանջով:

Դատարանը Էդգար Ա.-ին մեղավոր ճանաչեց ՀՀ քրեական օրենսգրքի 117 հոդվածով ու դատապարտեց 100 հազար դրամ տուգանքի: