Եվս մեկ «ազգի դավաճան». ո՞ւմ վրա է հույսը դրել Հայաստանի ազգային հավաքականը

Առաջին լրատվական / Երեկ հայտնի դարձավ, որ Մախաչկալայի «Անժիի» հայազգի դարպասապահ Դավիթ Յուրչենկոն չի մասնակցի ֆուտբոլի աշխարհի առաջնության ընտրական փուլի 6-րդ տուրի Մոնտենեգրոյի հետ հանդիպմանը:

News.am-ի թղթակցի հետ զրույցում Յուրչենկոն մասնավորապես նշել է. «Իրավիճակն այսպիսին է: Ես մեկ անգամ չէ, որ ասել եմ հավաքականում խաղալու իմ մեծ ցանկության մասին: Ես գիտակցում եմ, թե ինչ մեծ պատիվ է ֆուտբոլիստի համար ներկայացնել երկիրը: Շատ ուրախացա, երբ կարդացի, որ ինձ ցանկանում են հրավիրել: Հետո եղավ հրավերը: Բայց ինձ անձամբ չեն զանգահարել և չեն խոսել: Ռուսաստանում մենք սպասում էինք լեգեոներների քանակի մասին օրենքի փոփոխմանը: Ասում էին՝ երբ այն փոխվի, հայկական անձնագրով ֆուտբոլիստները այլևս լեգեոներ չեն համարվի: Բայց օրենքը չփոխեցին: Ասում են՝ չեն էլ փոխի: Ամեն իրավիճակում լուծում կա, պարզապես պետք է նստել ու քննարկել: Ինձ հետ դեռ կապ չեն հաստատել: Ես ինքս այստեղ փորձում եմ ամեն բան իմանալ այդ օրենքի մասին: Չգիտեմ՝ ինչպես կարելի է լուծել խնդիրը, բայց ցանկության դեպքում մի լուծում կարելի է գտնել: Ինձ ճիշտ հասկացեք: Ի՞նչ կպատահի, եթե ես գամ Հայաստան, և այստեղ ինձ նստեցնեն պահեստայինների նստարանին, կամ թիմս կորցնեմ: Ինչպե՞ս պետք է հետո ապրեմ»:

Մեր տեղեկություններով՝ ԵՏՄ անդամ երկրների մարզիկները Ռուսաստանում լեգեոներ չհամարվելու օրենքը ուժի մեջ է մտնելու հուլիսին՝ կանոնակարգի հաստատումից հետ: Չենք կասկածում, որ առաջիկա օրերին ՀՖՖ-ի ներկայացուցիչները Յուրչենկոյին որպես ազգի դավաճան ներկայացնելով՝ կհայտարարեն, որ իրենք ամեն ինչ արեցին, որ «Անժիի» դարպասապահը խաղա Հայաստանի հավաքականում: Նույն պատկերն էր ժամանակին Ռուսաստանում հանդես եկող պաշտպան Դենիս Թումասյանի դեպքում:

Կարծում ենք՝ եթե ՀՖՖ ներկայացուցիչը կամ ազգային թիմի մարզիչներից մեկը ծանոթանար ԵՏՄ երկրների ներկայացուցիչների լեգեոներների վերաբերյալ խնդրին և զրուցեր Յուրչենկոյի հետ, պատկերը բոլորովին այլ կլիներ: Այսօր Հայաստանի ազգային հավաքականին օդ ու ջրի պես անհրաժեշտ է բարձրակարգ դարպասապահ: Մեր հավաքականը աշխարհի առաջնության խմբային փուլի ուղեգիր նվաճելու իրական հնարավորություն ունի: Համաձայնվեք, սակայն, որ խնդիրը գործնականում անհնար կլինի լուծել, և առաջին հանդիպումներում հավաքականի դարպասը պաշտպանի Արսեն Բեգլարյանը կամ հայկական թիմերում հանդես եկող այլ դարպասապահներ:

Ի տարբերություն Հայաստանի՝ Մոնտենեգրոն լրջորեն է նախապատրաստվում առաջիկա հանդիպմանը: Հունիսի 4-ին բալկանյան հավաքականն ընկերական հանդիպում է անցկացնելու Իրանի հավաքականի հետ: Մոնտենեգրոն պատասխանատու հանդիպումից առաջ ընտրել է այնպիսի մրցակից, որը խաղամակարդակով մոտ է Հայաստանի ընտրանուն: Մեր նախորդ մրցակիցը՝ Ղազախստանը, ևս մերոնց հետ խաղից առաջ ընկերական հանդիպում անցկացրեց Կիպրոսի հետ: Այս հավաքականը խաղաոճով ևս մոտ է Հայաստանի հավաքականին:

Իսկ ո՞ւմ հետ մրցեց Հայաստանի հավաքականը Ղազախստանի հետ հանդիպումից առաջ և ո՞ւմ հետ է ընկերական հանդիպում անցկացնելու Մոնտենեգրոյի հետ խաղից առաջ: Ղազախստանի հետ մրցավեճից առաջ մերոնք ուղղակի ընկերական հանդիպում չանցկացրին, և եթե փայլուն խաղով Հայաստանի հավաքականի ավագ Հենրիխ Մխիթարյանը աչքի չընկներ, դժվար թե հաղթեինք: Մոնտենեգոյի հետ հավաքականի հետ հանդիպումից առաջ Հայաստանը հունիսի 4-ին մրցելու է Սետ Քիթս և Նևիսի ընտրանու հետ: Հավաքական, որի խաղաոճը երևի թե հայտնի է միայն ՀՖՖ-ի մասնագետներին:

Օրեր առաջ Հայաստանի ազգային հավաքականի մարզիչը նշել էր, որ Մոնտենեգրոյի հետ հանդիպումից առաջ ընկերական հանդիպում անցկացնելու նպատակով իրենք բանակցել են Հյուսիսային Իռլանդիայի և Նոր Զելանդիայի հավաքականների հետ, բայց ընդհանուր հայտարարի այդպես էլ չեն եկել:

Նշենք, որ թե Հյուսիսային Իռլանդիան և թե Նոր Զելանդիան խաղում են անգլիական ֆուտբոլ և խաղաոճով ամենևին նման չեն Մոնտենեգրոյին: Հունիսի 10-ին Հյուսիսային Իռլանդիան Բաքվում ընտրական հանդիպում է անցկացնելու Ադրբեջանի հետ: Այստեղից պարզ է դառնում, որ իրականում ոչ թե Հայաստանն է բանակցել Հյուսիսային Իռլանդիայի հետ, այլ վերջինս՝ Հայաստանի հետ:

Բրիտանական հավաքականը ցանկացել է մրցել խաղաոճով Ադրբեջանին մոտ հավաքականին, որը նաև մոտ է մրցավայրին: Կարծում ենք՝ մեկնաբանություններն ավելորդ են: Եթե մերոնց չի հաջողվում զրուցել Յուրչենկոյի հետ, էլ ուր մնաց կապ հաստատեն Հյուսիսային Իռլանդիայի հետ: Իսկ թե աշխարհի առաջնության ընտրական փուլի առաջիկա խաղում ո՞ւմ վրա է հույսը դրել Հայաստանի հավաքականը՝ դժվար է ասել: