Ծխելը կարգելվի․ մանրամասներ

Հայաստանում ծխելը հասարակական վայրերում կարգելվի, չորեքշաբթի լրագրողներին ասաց առողջապահության նախարար Լևոն Ալթունյանը` Առանց ծխախոտի միջազգային օրվան նվիրված միջոցառմանը, որն անցկացվում է «Ծխախոտը մեր ընդհանուր թշնամին է» կարգախոսով։

«Համապատասխան հանձնարարություն ենք ստացել երկրի գերագույն իշխանությունից և ծրագրում ենք ներկայացնել օրենքը խորհրդարանի դիտարկմանն արդեն 2017 թվականի նոյեմբերին։ Դա թույլ կտա կրճատել երկրում ծխողների թիվը 30-40 տոկոսով»,– ասաց Ալթունյանը։

Ըստ նրա, նախարարությունը ներկայացրել է կառավարության քննարկմանը ծխախոտի դեմ պայքարի ռազմավարական ծրագիր, որը նախատեսում է չորս բաղադրիչ` օրենսդրական, միջազգային, գովազդա–հոգեբանական և առողջապահական։

Ռազմավարության շրջանակում նախատեսված է բոլոր փակ հասարակական վայրերում ծխելն արգելելու մասին օրենսդրության մշակում։

«Չի կարելի լինի ծխել ոչ միայն չծխողների մոտ, այլ առհասարակ ոչ մի տեղ։ Եվրոպայի և ԵՏՄ–ի մի շարք երկրներ արդեն ներդրել են նմանատիպ արգելքներ, և մենք մտադիր ենք նաև Հայաստանում նմանատիպ մշակույթ ձևավորել, որը կարող է հակազդեցություն առաջացնել։ Բայց մենք դրան պատրաստ ենք»,– ասաց Ալթունյանը։

Նա նշեց, որ անձամբ ինքը թողել է ծխելը 15 տարի առաջ` պարզապես այդպիսի որոշում կայացնելով։

Ինչպես կարծում է նախարարը, ծխելու դեմ առավել արդյունավետ քայլը ծխողի «գրպանին խփելն է», ոչ թե հոգեբանական ազդեցությունը։ Չէ՞ որ յուրաքանչյուր ծխող կարծում է, որ ծխելու կապված, այդ թվում առողջական խնդիրներն անձամբ իրեն չեն սպառնա։

Հենց այդ պատճառով էլ, ըստ նրա, դիտարկվում է նաև ծխախոտի արտադրանքի հարկերի բարձրացման հնարավորությունը, ինչը կհանգեցնի ծխախոտի գների աճի։

«Մենք չենք կարծում, որ նման քայլը կհանգեցնի ընտանեկան բյուջեի կրճատմանը, հակառակը, դա կխրախուսի նրանց, ովքեր փորձում են թողնել այդ սովորությունը, և որպես հետևանք կհամալրի ընտանեկան բյուջեն տարեկան միջինը 250 հազար դրամ»,– ասաց Ալթունյանը։

ԱՀԿ–ի տվյալներով, տարեկան ծխելուց աշխարհում մահանում է մոտ 7 մլն մարդ, ևս 600 հազար մարդ մահանում է պասիվ ծխելուց, նրանց թվում` կանայք և երեխաներ, ովքեր ապրում են ծխողների հետ։
Ծխելը 15 տեսակի քաղցկեղների, սիրտ–անոթային և թոքերի հիվանդությունների պատճառ է, որը հանգեցնում է մահվան։