Քաղաքապետը ժուչոկի, 70 հազարի ու երկրի վիճակի մասին

Արթիկի ՀՀԿ–ական քաղաքապետ Մխիթար Վարագյանը «Փաստի» հետ զրույցում պնդում է, որ ոչ ինքը, ոչ իր տեղակալը առնչություն չունեն մոտ մեկ ամիս առաջ Շիրակի մարզի Արթիկ քաղաքի թիվ 4 մանկապարտեզի տնօրենի սենյակում հայտնաբերված գաղտնալսման սարքի՝ ժուչոկի հետ: Նշենք, որ Արթիկի մանկապարտեզում հայտնաբերված գաղտնալսող սարքի գործով հարուցվել է քրեական գործ՝ ՀՀ Քրեական օրենսգրքի 144 հոդվածի հատկանիշներով, մարդու անձնական կամ ընտանեկան գաղտնիք համարվող տեղեկություններն առանց նրա համաձայնության հավաքելը կամ պահելը, եթե դրանք նախատեսված չեն օրենքով` պատժվում է տուգանքով` նվազագույն աշխատավարձի 200–500–ապատիկի չափով, կամ կալանքով` 1–2 ամիս ժամկետով:

Նշենք, որ մի քանի օր առաջ Արթիկի քաղաքապետ Մխիթար Վարագյանի որոշմամբ, Արթիկի թիվ 4 մանկապարտեզի տնօրեն Հասմիկ Աջամօղլյանն ազատվել է աշխատանքից: Վերջինս մամուլում ասել է, որ դա քաղաքական հաշվեհարդար է իր հանդեպ, քանի որ ՏԻՄ և ԱԺ ընտրությունների ժամանակ սատարել է Վարագյանի մրցակից Մուշեղ Պետոյանին, ինչն էլ Վարագյանի սրտով չի եղել:

Ներկայացնում ենք «Փաստի» զրույցը Արթիկի քաղաքապետ Մխիթար Վարագյանի հետ:

– Պարոն Վարագյան, ասվում է, որ քաղաքական հաշվեհարդարի արդյունքում եք աշխատանքից ազատել մանկապարտեզի տնօրենին, նաև մամուլում տեղեկություն կա, որ Ձեր տեղակալն է նրա աշխատասենյակում ժուչոկ տեղադրել:

– Էդ ամեն ինչը հերյուրանք է: Ինքն ազատվել է աշխատանքից իրենց հիմնարկի չարաշահումների առթիվ:

– Որքա՞ն գումարի չարաշահման մասին է խոսքը:

– Կոնկրետ 70 հազար դրամ պիտի վերականգնեն:

– Դա այդքան էլ մեծ գումար չէ, որ մարդուն աշխատանքից ազատեն:

– Էսօր 70 հազար, վաղը 700 հազար, գումարի չափն ի՞նչ կապ ունի: Ֆինանսական չարաշահում են թույլ տվել: Նախկինում էլ խախտումներ են ունեցել, չեն ուղղել: Ամեն հիմնարկ որ 70 հազար առնի, ի՞նչ է լինելու էս մեր երկրի վիճակը:

– Պարոն Վարագյան, իսկ Դուք Ձեզ ընտրություններում սատարածների շրջանո՞ւմ էլ եք նման աուդիտ իրականացնում և աշխատանքից ազատե՞լ եք ինչ–որ մեկին:

– Այո, ես բոլորին նման ձևով եմ վերաբերվում: Ես ընդհանրապես կողմնակիցներ չունեմ: Կողմնակիցներ կունենամ դրսում, աշխատանքի վայրում կողմնակիցներ չունեմ:

– Բայց Ձեր օգտին էլ ընտրությունների ժամանակ աշխատողներ եղել են, չէ՞:

– Եղել են և ավելի խիստ իրանց հետ եմ վերաբերվելու:

– Ձեր օգտին աշխատածներից մեկը կա՞ ում աշխատանքից հանել եք:

– Իհարկե՝ կա:

– Կասե՞ք անուն–ազգանունը:

– Բայց ինչի՞ պիտի ասեմ:

– Եթե չեք ասում, ուրեմն՝ չկա:

– Չէ, ասում եմ՝ կա:

– Պարոն Վարագյան, գաղտնալսման սարքի մասով մամուլում տեղեկություն կա, որ Ձեր տեղակալն է այն դրել մանկապարտեզի տնօրենի սենյակում:

– Ժուչոկի պահով իրավապահները թող զբաղվեն: Չգիտեմ՝ ոնց են հայտնաբերել, ով է հայտնաբերել, տեղյակ չեմ: Մամուլից եմ տեղեկացել և հիմա համապատասխան մարմինները զբաղվում են, իրենք քննություն կանցկացնեն, կպարզվի էդ ամեն ինչը:

– Իսկ եթե պարզվի որ Ձեր տեղակալը կամ Դուք դրա հետ առնչություն ունե՞ք:

– Հնարավոր չէ կապ ունենանք իմ տեղակալը կամ ես: Եթե ես ներքին աուդիտ եմ նշանակել, ինչի համար պետք է ժուչոկ տեղադրեմ: Ամեն ինչը ես ժուչոկո՞վ եմ իմանալու, թե՞ աուդիտի որոշումներն եմ նայելու: Աուդիտը գալիս ամեն ինչ զեկուցում է: Ի՞նչ ժուչոկի մասին է խոսքը:

Շարունակությունը` «Փաստ» օրաթերթի այսօրվա համարում