Մոսկվայի օդանավակայաններում հետաձգվել է ավելի քան 30 չվերթ. ուղևորները փակել են սպասասրահը

Եղանակային պայմանների կտրուկ վատթարացման հետեւանքով ավելի քան 30 չվերթ է հետաձգվել Մոսկվայի օդանավակայաններում հետաձգվել: Ուղեւորները բողոքի ակցիա են իրականացնում: Այս մասին հայտնում է gazeta.ru-ն:

Նշվում է, որ «Դոմոդեդովո» օդանավակայանում հետաձգվել է 21 չվերթ, եւս 6-ը չեղյալ է հայտարարվել: «Շերեմետեւո» օդանավակայանում հետաձգվել է 10 չվերթ:

Լրատվամիջոցները հայտնում են, որ խնդիրը եղանակային պայամանների վատթարացումն է: Ռուսաստանի հիդրոօդերեւութաբանական կենտրոնի տեղեկություններով՝ Մոսկվայի մարզում եւ Կենտրոնական դաշնային շրջանի մի քանի մարզերում հայտարարվել է եղանակային վտանգի «դեղին» մակարդակ՝ ուժեղ քամու եւ կայծակների պատճառով:

Ինչպես հայտնում է Lenta.ru գործակալությունը, չվերթների զանգվածային ուշացումների պատճառով «Վիմ-Ավիա» ռուսական ավիաընկերության ուղեւորները բողոքի ակցիա են կազմակերպել Մոսկվայի «Դոմոդեդովո» օդանավակայանում:

Նշվում է, որ ուղեւորները փակել են օդանավակայանի սպասասրահներից մեկը եւ արգելափակել տեղեկատվական կետերը: «Հետաձգվել են ինչպես ներքին, այնպես էլ միջազգային չվերթներ: Առավել շատ ուշացումը տեւել է դեպի Թուրքիա եւ Կիպրոս չվերթների դեպքում»,- գրում է լրատվամիջոցը:

Ուղեւորները բողոքում են, որ ուշացումների պատճառի մասին ավիափոխադրողի ներկայացուցիչներն իրենց չեն հայտնել: Ենթադրաբար, դա տեղի է ունեցել ինքնաթիռներից մեկի անսարք լինելու պատճառով: Ուղեւորներին տրամադրել են ջուր եւ սննդի կտրոններ, ընդ որում՝ հյուրանոցներում տեղավորել են միայն քչերին, մյուսները ստիպված են եղել գիշերել օդանավակայանում: