«Դո՞ւք ինչից եք անհանգիստ». խուճապ կառավարությունում

Կառավարությունն այսօրվա նիստում քննարկեց Կոռուպցիայի կանխարգելման և հարցերով մարմնի ստեղծման նախագիծը:
Արդարադատության նախարարի պաշտոնակատար Արթուր Հովհաննիսյանը կառավարության նիստում ասաց, որ նախագծով Բարձրաստիճան պաշտոնատար անձանց էթիկայի հանձնաժողովի հենքի վրա ստեղծվում է կոռուպցիայի կանխարգելման հարցերով մարմին, որն իրականացնելու է կառուպցիայի կանխարգելման, այդ թվում՝ էթիկայի, շահերի բախման, անհամատեղելիության պահանջների, բարձրաստիճան պաշտոնատար անձի և հանրային ծառայողի նկատմամբ կիրառվող այլ սահմանափակումներ պահպանմանը և այլն:
Այս մարմինն օժտված է լինելու անհրաժեշտ գործիքակազմով, այդ թվում՝ պատժամիջոցների կիրառման կարողությամբ: Նախագծով պարտադիր հայտարարագրում է նախատեսվում նաև այն հանրային ծառայողների համար, որոնք թեպետ բարձրաստիճան պաշտոնյա չեն, սակայն իրենց գործունեությամբ ընդգրկված են ռիսկային գոտում՝ գնումների գործընթաց, քննիչներ, դատախազներ:
Հաշվի առնելով այն հանգամանքը, որ նախագծի փաթեթի մշակմանն ակտիվորեն մասնակցել է նաև ներկայում ԱԺ փոխնախագահ Արփինե Հովհաննիսյանը, Արթուր Հովհաննիսյանը խնդրեց նրան ճանաչել որպես նախագծերի համահեղինակ և ԱԺ-ում հիմնական զեկուցող նշանակել հենց նրան:
Գլխավոր դատախազը երկօրյա ժամկետ խնդրեց՝ հստակություններ մտցնելու ու իրենց ներկայացրած առաջարկությունների ճակատագիրն իմանալու համար, ԿԲ նախագահն էլ խնդրեց իրենց կարծիքներն էլ հաշվի առնել:
«Շատ լավ, անհանգստացան բոլորը, երկու օր ժամանակ», ասաց Կարեն Կարապետյանը:
Միջամտեց Քաղծառայության խորհրդի նախագահ Մանվել Բադալյանը՝ ասաց, որ իրենց էլ է ժամանակ պետք: «Դո՞ւք ինչից եք անհանգիստ, պարոն Բադալյան», հարցրեց Կարեն Կարապետյանը: «Անհանգիստ չենք, ուզում ենք աջակցենք», արձագանքեց Բադալյանը: