«Էդ արյունը ո՞նց ա էկել տղիս գլխից….». բենզալցակայանի աշխատակցի սպանության գործով վկաները մանրամասներ են հայտնել

1in.am / Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ շարունակվեց Լևոն Մելքոնյանի և Մկրտիչ Բաբայանի գործով դատավարությունը:

Երկու երիտասարդները մեղադրվում են ծանր հանցագործությունների՝ ծանրացուցիչ հանգամանքներում, նախնական համաձայնությամբ կատարված սպանության և ավազակային հարձակման համար՝ ՀՀ քրեական օրենսգրքի 104 հոդվածի 2-րդ մասի 7,8 և 175 հոդվածի 2-րդ մասի 1,4 կետերով:

Դեպքը տեղի է ունեցել 2015 թվականի դեկտեմբերի լույս 21-ի գիշերը՝ ժամը 4-ն անց 50-ի սահմաններում:

Ըստ մեղադրանքի՝ Լևոն Մելքոնյանը ուրիշի գույքը ավազակային հարձակմամբ հափշտակելու վերաբերյալ նախնական համաձայնության է եկել ընկերոջ՝ զինծառայող, սպա, կոչումով՝ ավագ լեյտենանտ Մկրտիչ Բաբայանի հետ:

Հանցագործությունը կատարելու նպատակով նրանք նախապես ձեռք են բերել դիմակ, հակագազ, ծալովի դանակ, երկու զույգ բժշկական ձեռնոցներ ու ատրճանակի տեսքով կրակայրիչ:

Որոշված օրը՝ դեկտեմբերի 21-ին, գիշերվա ժամը 4-ի սահմաններում նրանք գնացել են Երևան քաղաքի Մյասնիկյան 20/1 հասցեում գործող «Արաքս» բենզալցակայանի մոտ, ապա հարձակվել են բենզալցակայանի աշխատող Ավետիք Մարտիրոսյանի վրա:

Գումար են պահանջել, սակայն հանդիպել են Մարտիրոսյանի ակտիվ դիմադրությանը:

Իրենց հանցավոր մտադրությունն իրականացնելու նպատակով, ըստ առաջադրված մեղադրանքի, Մելքոնյանն ու Բաբայանը կատարել են շահադիտական դրդումներով ու ավազակությամբ զուգորդված սպանություն:

Համաձայն առաջադրված մեղադրանքին՝ ամբաստանյալները ատրճանակ-կրակայրիչի կոթով բազմաթիվ հարվածներ են հասցրել տուժողին: Իսկ Լևոն Մելքոնյանը, դրան զուգահեռ, նաև դանակի բազմաթիվ հարվածներ է հասցրել՝ տուժողին պատճառելով կյանքին վտանգ սպառնացող բազմաթիվ ծանր վնասվածքներ:

Այնուհետև Մելքոնյանն ու Բաբայանը, նկատելով, որ մոտենում են հարևան «Իբիցա» հյուրանոցի աշխատողները, դիմել են փախուստի:

Տուժող Ավետիք Մարտիրոսյանը տեղափոխվել է հիվանդանոց, որտեղ մահացել է ստացած վնասվածքներից:

Ըստ մեղադրանքի՝ Մկրտիչ Բաբայանը գործով չպարզված աղբյուրից ապօրինի ձեռք է բերել ու պահել ռազմամթերք՝ փամփուշտներ, որոնք խուզարկությամբ հայտնաբերվել ու առգրավվել են:

Կատարված հանցագործությունը ֆիքսվել է տեսանկարահանող սարքերով, այնպես որ՝ ամբաստանյալները չեն ժխտում իրենց կողմից արարքի կատարումը:

Բայց, ըստ ամբաստանյալների շահերի պաշտպանների, Լևոն Մելքոնյանը նախաքննության ավարտին հայտնել է, թե ինքը տուժողին սպանելու դիտավորություն չի ունեցել, այդ դիտավորությամբ չէ, որ հարվածներ է հասցրել դանակով:

Իսկ Մկրտիչ Բաբայանը սպանության մեղադրանքը չի ընդունել՝ պնդելով, որ տուժողի մահը իր գործողությունների արդյունքում չէ, որ վրա է հասել, ինքը դանակով տուժողին ընդհանրապես հարվածներ չի հասցրել…

Երկու ամբաստանյալն էլ նախկինում երկու անգամ դատվել են, նրանց դատվածությունը մարված է:

Դատարանը վկաների հարցաքննության փուլում է:

Հարցաքննվեց «Արաքս» բենզալցակայանի գանձապահ Արտաշես Հ.-ն: Նա ասաց, որ 2015 թվականի դեկտեմբերի 21-ի առավոտյան սովորականի նման աշխատանքի է գնացել, բայց տեսել է, որ բենզալցակայանի մոտ մարդիկ են հավաքված: Իմացել է, որ գիշերը ավազակային հարձակում է եղել, հարձակվողները դանակով հարվածել են բենզալցակայանի աշխատողին: Վերջինիս տարել էին հիվանդանոց, բայց շուտով հայտնի է դարձել, որ նա մահացել է:

Մի քանի օր անց համացանցային լրատվամիջոցներից վկան իմացել է, որ բացահայտվել են երկու կասկածյալներ, որոնցից մեկը՝ Լևոն Մելքոնյանը, նախկինում եղել է իրենց բենզալցակայանի աշխատողը:

Վկան ասաց, որ բենզալցակայանի դրամարկղում օրական հավաքվում է 250-300 հազար դրամ, որը ժամը 18-19-ի սահմաններում հանձնվում է իրեն: Գիշերային աշխատողի մոտ թողնում են մոտ 30 հազար դրամ: Գիշերվա ընթացքում այդ գումարին կարող է ավելանալ 10-20 հազար դրամ, այսինքն՝ հարձակման պահին բենզալցակայանի աշխատողի մոտ մեծ գումար լինել չէր կարող, նրա մոտ կարող էր լինել 40-50 հազար դրամ: Դեպքը ձմռանն է կատարվել, երբ ավելի քիչ բենզին են իրացնում, հետևաբար՝ աշխատողի մոտ կարող էր ավելի քիչ գումար լինել:

Վկան ասաց, որ ամբաստանյալ Լևոնն իրենց բենզալցակայանում աշխատել է 3-4 ամիս: Ընդհանուր առմամբ՝ նորմալ աշխատող է եղել, բայց երկու-երեք անգամ աշխատանքի է ներկայացել խմած վիճակում, ինչի պատճառով նրան ազատել են աշխատանքից: Լևոնը բենզալցակայանի դրամարկղից գումար էր վերցրել՝ 10-15 հազար դրամ: Աշխատանքից ազատվելուց հետո նա այդ գումարը չի վերականգնել, չնայած նրան զանգել են բենզալցակայանի տնօրենը, հաշվապահը, մի անգամ էլ վկան է զանգել, բայց մինչ օրս այդ գումարը վերականգնված չէ:

Ինչ վերաբերում է տուժող Ավետիք Մարտիրոսյանին, ապա նա բենզալցակայանում նոր էր աշխատանքի ընդունվել, ընդամենը մի քանի օր էր աշխատում… Երբ Ավետիքն աշխատանքի է ընդունվել, Լևոն Մելքոնյանն արդեն ազատված էր աշխատանքից, նրանք իրար հետ բենզալցակայանում չեն աշխատել:

Վկան նշեց, որ դեպքի օրվա առավոտյան բենզալցակայանի տնօրենը իրենց ցուցադրել է տեսախցիկի նկարահանած նյութը: Ինքը տեսել է, որ անցումի կողմից երկու հոգի դիմակներով գալիս են դեպի բենզալցակայան: Նրանց ձեռքերին դանակ, ատրճանակ չի տեսել:

Վկային հիշեցրին, որ նախաքննական ցուցմունքում նա ասել է, թե տեսանյութի մեջ տեսել է նաև՝ ինչպես են հարվածներ հասցրել տուժողին, տեսել է արյուն: Վկան ընդունեց, որ իրոք՝ տեսել է, բայց մոռացել էր…

Տուժողի իրավահաջորդը՝ սպանված Ավետիք Մարտիրոսյանի հայրը վրդովվեց վկայի՝ իր կարծիքով՝ մեղմացված ցուցմունքից, ու ասաց. «Զենք չի եղե՞լ, դանակ չի եղե՞լ, խի՞ ա զրպարտում, էդ արյունը ո՞նց ա էկել տղիս գլխից, ձեռքով խփելուց արյուն ա՞ գալիս, ո՞նց չի տեսել…»:

Տուժողի իրավահաջորդին հանգստացրին՝ ասելով, թե դատարանն արդեն հետազոտել է ապացույցները, մասնավորապես՝ բենզալցակայանի տեսախցիկի նկարահանած տեսանյութը, կողմերը տեսել են և՛ տուժողին հասցված հարվածների պահը, և՛ ամբաստանյալների ձեռքին եղած դանակն ու զենքը…

Վկա Ռոբերտ Ս.-ն այն գումարտակի շտաբի պետն է, որտեղ ծառայել էր ամբաստանյալներից՝ ավագ լեյտենանտի կոչում ունեցած Մկրտիչ Բաբայանը:

Վկան ասաց, որ 2015 թվականի դեկտեմբերի 19-20-ը շաբաթ-կիրակի էր, Մկրտիչ Բաբայանը ծառայության է ներկայացել երկուշաբթի՝ դեկտեմբերի 21-ի առավոտյան, ստացվում է՝ դեպքից հետո: Ծառայության վայրում ոչ ոք չգիտեր, թե գիշերը ինչ է կատարվել, ինչի մասնակից է եղել ավագ լեյտենանտ Բաբայանը:

Հետո են իմացել և զարմացել են…

Վկան նշեց, որ իրենց գումարտակում դեպքից հետո ստուգում է կատարվել ու փամփուշտների պակասորդ չի արձանագրվել, ինքը չգիտի, թե Մկրտիչ Բաբայանը որտեղից կարող էր փամփուշտներ վերցնել և տուն տանել: Վկան չբացառեց, որ կրակային պատրաստության պարապմունքներից հետո չկրակված մեկ-երկու փամփուշտներ լինեն մի կողմ գցված, ինչ-որ մեկը միգուցե դրանք կարող էր վերցնել ու գրպանում պահել:

Վկան ասաց, որ Մկրտիչ Բաբայանն ընդհանուր առմամբ նորմալ է ծառայել: Նախագահողը վկային հիշեցրեց, որ զորամասի հրամանատարությունը ավագ լեյտենանտ Բաբայանին խիստ բացասական ծառայողական բնութագիր է տվել:

Վկան ասաց. «Չեմ ասում, թե Բաբայանը իդեալնի է ծառայել, թերություններ եղել են, դրանց համար նա տույժ է ստացել… Էս պատմությունն իմանալով՝ շատ եմ զարմացել՝ իրանից չեմ պատկերացրել, որ տենց բան կարող էր լինել… »:

Վկան շատ մեղմ գույներով էր բնութագրում ամբաստանյալ Բաբայանին, և էական հակասություն առաջացավ նրա նախաքննական ու դատաքննական ցուցմունքների միջև: Հրապարակվեց վկայի նախաքննական ցուցմունքը, որում վկան նշել էր՝ Բաբայանը միջին աստիճանի կրթությամբ, թույլ կազմակերպչական հատկանիշներ ունեցող սպա էր, մշտապես թերանում էր ծառայողական պարտականությունների կատարման մեջ, «այնպես վատ էր ծառայում, որ զորամասի հրամանատարությունը նրան ներկայացրել էր զորացրման, կոչումը մեկ աստիճանով իջեցնելուն… Բաբայանը բազում տույժեր ուներ, ոչ մի խրախուսանք չէր ստացել…»:

Ամբաստանյալ Մկրտիչ Բաբայանի շահերի պաշտպան, փաստաբան Լիպարիտ Սիմոնյանը նկատեց, որ նախաքննական ցուցմունքը «որոշակի ուռճացված է գրված»:

Վկա Աղվան Ս.-ն նույնպես Մկրտիչ Բաբայանի զորամասից էր՝ նրա վաշտի հրամանատարն էր եղել: Վկան ասաց, թե Մկրտիչի հետ կարճ ժամանակ է ծառայել՝ մոտ յոթ ամիս. «Չեմ ասի՝ օրինակելի ծառայող էր, բայց շատ կոպիտ խախտումներ էլ նրա կողմից չեն եղել իմ օրոք…»:

Բաբայանի տանը ռազմամթերք հանդիսացող փամփուշտներ հայտնաբերելու մասով վկան պատասխանեց, թե չի կարող ասել՝ Բաբայանը որտեղից է տուն տարել այդ փամփուշտները: Կրակային պատրաստության պարապմունքից առաջ յուրաքանչյուրին տրվում են որոշակի քանակությամբ փամփուշտներ, հետո հսկվում է՝ քանի փամփուշտ է կրակվել, բայց կրակողներին չեն խուզարկում՝ այդ աստիճանի չեն կասկածում, որ նրանք կարող են չկրակված փամփուշտներ վերցնել ու տանել. «Թե իրա հնարամտությունն ու ճարպկությունը ինչքան թույլ կտար նման բան անելու՝ չեմ կարա ասեմ»:

Դատական հաջորդ նիստին կշարունակվի վկաների հարցաքննությունը: Այս գործով դատարան չներկայացող մի քանի վկաների վերաբերյալ կկայացվի բերման ենթարկելու որոշում:

Սպանված Ավետիք Մարտիրոսյանի վշտահար հայրը դատական նիստից հետո մեր զրույցի ժամանակ ասաց, որ որդին 47 տարեկան էր, ընտանիք ուներ, երկու երեխա: Նա «Արաքս» բենզալցակայանում դեպքից ընդամենը մի քանի օր առաջ էր աշխատանքի ընդունվել: Ավետիքը լավ որդի էր, լավ հայր, աշխատող, ուժեղ երիտասարդ տղամարդ էր, որ դիմադրություն է ցույց տվել իր վրա հարձակված դիմակավորներին…