Ամերիկան նվազեցնում է Հայաստանին տրամադրվող օգնությունը

ԱՄՆ նախագահ Դոնալդ Թրամփի վարչակազմը Կոնգրեսի համար հրապարակել է 2018թ. ֆինանսական տարվա (FY18) բյուջեի վերաբերյալ հանձնարարականները, ըստ որի նախատեսվում է Հայաստանին տրամադրվող օգնությունը կրճատել 67 տոկոսով: Այս մասին հաղորդում է Masis Post պարբերականը:

«Համագումարը կշարունակի առաջ մղել առանցքային առաջնահերթությունները ՝ ի շահ Հայաստանի ժողովրդի և հայ-ամերիկյան հարաբերությունների: Քանի որ ներկայիս վարչակազմը կրճատում է արտասահմանյան օգնությունը բոլոր ուղղություններով, պետք է ապահովենք, որպեսզի Հայաստանը ռեսուրսներ ունենա, որ բավարարի հումանիտար կարիքները, որոնք առաջացել են փախստականների հետ կապված ներկայիս իրավիճակի, Թուրքայի կողմից շրջափակման, ինչպես նաև Ադրբեջանի կողմից հրադադարի ռեժիմի պարբերաբար խախտումների պատճառով»,-ասել է Ամերիկայի հայկական համագումարի գործադիր տնօրեն Բրայան Արդունին:

Նշվում է, որ Հայաստանին տրամադրվող օգնությունը 20.4 միլիոն ԱՄՆ դոլարից կդառնա 6.8 միլիոն ԱՄՆ դոլար, որից 4 միլիոնը կհատկացվի Տնտեսական աջակցության և զարգացման հիմնադրամին, 1.5 միլիոն դոլարը՝ թրմանյութերի դեմ պայքարի, 700 հազար դոլարը՝ հակաահաբեկչական, ականազերծման և հարակից ծրագրերի համար: Բյուջեի նախագիծը խորհուրդ չի տալիս ռազմական աջակցություն ցուցաբերել Հայաստանին կամ Ադրբեջանին, բայց նախատեսում է 600 հազար դոլար տրամադրել Միջազգային ռազմական կրթության և ուսուցման համար (Military Education and Training (IMET)):

Վրաստանին, Ուկրաինային և Ադրբեջանին հատկացվող օգնությունը համապատասխանաբար կկրճատվի 58, 70 և 90 տոկոսով: