«Ես արդեն այլ ելք չունեմ, չգիտեմ՝ ինչ անեմ»․ նամակ՝ վարչապետին
Հասարակություն
Վարչապետ Կարեն Կարապետյանը բավական ակտիվ է Ֆեյսբուք սոցիալական ցանցում: Գրառումներ է կատարում, որոնց տակ քաղաքացիները մեկնաբանություններ են թողնում՝ հույսով, որ վարչապետը կարձագանքի իրենց խնդրին և լուծում կտա:
Օրինակ՝ Նվեր Թովմասյան անունով մեկը վարչապետից հրապարակայնորեն հանդիպում է խնդրում, որպեսզի ներկայացնի իր խնդիրը:
«Ես արդեն այլ ելք չունեմ, չգիտեմ՝ ինչ անեմ, թողնեմ գնամ գերի հանձնվեմ: Իմ հույսը մենակ դուք եք: Խնդրում եմ մի հանդիպում, որի ժամանակ դուք կիմանաք խնդիրը»,- գրել է քաղաքացին և թողել իր բջջային հեռախոսահամարը:
Երբ զանգահարեցինք Նվեր Թովմասյանին՝ հասկանալու խնդիրը, պարզվեց, որ նա տարիներ շարունակ աշխատել է Սևանի թերակղզում որպես ավտոկայանատեղիի աշխատակից, օրենքով, գրանցված աշխատող է եղել, սակայն երկու ամիս առաջ, երբ Սևանի եկեղեցու քահանան փոխվել է, և նոր քահանա է նշանակվել, վերջինս ազատել է ավտոկայանատեղիի աշխատակցին՝ Նվեր Թովմասյանին, և նրա փոխարեն նշանակել իր սանիկին:
«Ես աշխատում էի Սևանի թերակղզում որպես ավտոյի ստայանշիկ, բայց երկու ամիս առաջ Տեր Նշանը նշանակվեց եկեղեցու քահանա, ու հաջորդ օրը բռնեց ինձ ազատեց ու իր ծանոթին՝ իր սանիկին դրեց իմ տեղը: Նա հիմա երեք տեղ է աշխատում, իսկ ես այդ աշխատանքի հույսին էի: Ինձ եկան, ասեցին՝ դու ազատված ես, ու վերջ, ոչ մի պատճառաբանություն: Հանեցին ու շպրտեցին գործից»,- «Առաջին լրատվական»-ի հետ զրույցում պատմեց Նվերը:
Նվեր Թովմասյանը իր խնդրով դիմել է անգամ Գեղարքունիքի նախկին մարզպետ Ռաֆիկ Գրիգորյանին, վերջինս էլ Սևանի քաղաքապետին է հանձնարարել «Նվերի հարցը լուծել», սակայն հարցն այդպես էլ լուծում չի ստացել:
«Քաղաքապետն էլ չի կարողանում հարցը լուծել. քանի տեղ զանգեց իմ հարցով, բայց էդպես էլ չլուծվեց հարցը, ինձ հետ չեն ընդունում գործի: Դե հիմա, որ ոչ մարզպետը, ոչ քաղաքապետը չեն կարողանում իմ խնդիրը լուծեն, միակ հույսս մնացել ա վարչապետը, ինքը լավ կապեր ունի, հնարավորություններ ունի, մտածում եմ՝ իր հետ հանդիպեմ, գոնե կօգնի: Ես աշխատանքի ուրիշ հույս չունեմ, երկու հաշմանդամ ծնողներ ունեմ, երկու անչափահաս երեխա և նրանց իմ էդ աշխատած գումարով էի պահում: Բայց հիմա, արդեն երկու ամիս է՝ ծայրահեղ ծանր վիճակում է իմ ընտանիքը, ես օրվա հացի խնդիր ունեմ: Խնդրում եմ վարչապետին օգնի ինձ, որ իմ երեխաները սոված չմնան»,- մեզ հետ զրույցում ասաց Նվեր Թովմասյանը:
1
2
3
4
5
1
2
3
4
5
2
4
