Նախկին ոստիկանապետը՝ վերջին ընտրություններում Ոստիկանության պահվածքի մասին
Քաղաքականություն
Ներկայացնում ենք ՀՀ նախկին ոստիկանապետ, ՀՀԿ պատգամավոր ընտրված Ալիկ Սարգսյանի հետ մեր զրույցը
– Պարոն Սարգսյան, որպես նախկին ոստիկանապետ կխնդրեի գնահատել ոստիկանության պահվածքն այս ընտրություններում, հատկապես որ ոստիկանությունը չկարողացավ գեթ մեկ ընտրակաշառք բաժանողի հայտնաբերել, նաև՝ բռնություն կիրառեց Զարուհի Փոստանջյանի ու նրա դստեր հանդեպ:
– Ոստիկանության վերաբերյալ ցանկացած հարցադրում ինձ համար անհասկանալի է այն առումով, որ ոստիկանությունն այսօր շատ կարևոր խնդիր է իրականացնում, ինչու չէ՝ թիվ մեկ պատասխանատուն է հասարակական կարգը ճիշտ կազմակերպելու առումով և չեմ տեսնում, թե ոստիկանությունը ոչ համարժեք ինչ–որ քայլեր ձեռնարկեց, հնարավորության դեպքում չեղավ ընտրակաշառքների դեմ պայքար, ես էդպես չեմ մտածում: Իսկ եղա՞ն հայտարարություններ, ահազանգեր ընտրակաշառքների վերաբերյալ, որ ոստիկանությունը համապատասխան գործողություններ չկատարեց, կարծում եմ՝ չեղավ: Իսկ ինչ վերաբերում է Զարուհի Փոստանջյանի հետ կապված միջադեպին, ամեն դեպքում հարիր էլ չէր, ճիշտն ասած, Զարուհի Փոստանջյանին, որպես քաղաքապետի թեկնածու հայտնվել հենց էն կիզակետում, որը կոնկրետ ՀՀԿ շտաբն է: Նա էլ իր իրավունքները, կարծես թե, «չարաշահել է»: Վերջապես դա մասնավոր տարածք է:
– Զարուհի Փոստանջյանը ահազանգի հետքերով է մտել ՀՀԿ շտապ և ահազանգը հետևյալն էր, որ էնտեղ ընտրակաշառք են բաժանում: Այսինքն՝ ՀՀԿ շտաբն անձեռնմխելի՞ է, ինչո՞ւ պիտի թեկնածուն չկարողանար մտնել էնտեղ:
– Գիտե՞ք ինչ, ցանկացած շտաբ է անձեռնմխելի հենց այն առումով, որ այն սեփական տարածք է, մարդիկ ինչ–որ աշխատանք են կատարում: Եթե Զարուհի Փոստանջյանը նախապես դիմեր իրավապահ կառույցներին, նրանք էլ համապատասխան նախապատրաստվեին շտաբ մտնելու և ինչու չէ խուզարկություն կատարելու, էդ դեպքում ամեն ինչը կլիներ օրենքի սահմաններում, իրավաչափ: Բայց ինքնուրույն որոշում կայացնել, մտնել շտաբ և խուզարկություն կատարել, կարծում եմ, սա ճիշտ չի, և մենք պետք է մտածեինք՝ հետագայում այդ շտաբները նախապես պատրաստ լինեին նման հարձակումների, ներխուժումների:
– Ասել է թե՝ Դուք դա հարձակո՞ւմ եք համարում, շտաբը հասարակական կառույց է: Նաև տեսանք թե ահազանգի հետքերով գնացած Զարուհի Փոստանջյանի և նրա դստեր հետ ինչպես վարվեց ոստիկանությունը:
– Ես ենթադրում եմ, որ տվյալ շտաբից մարդիկ ահազանգել են նույն ոստիկանություն, որը դեպքի առթիվ եկել է և իր գործողություններն է կատարել: Չեմ ուզում գնահատական տալ, դրանք իրավաչափ էին, թե՝ ոչ, կարծում եմ, ժողովուրդը դա կգնահատի, համապատասխան մարմիններն էլ թող հետաքննություն կատարեն, պարզեն: Ես դա չեմ բնութագրում որպես բռնություն: Ես չգիտեմ՝ ինչ պահ է եղել էդտեղ:
– Պարոն Սարգսյան, եթե Դուք լինեիք ոստիկանապետ, Դո՞ւք էլ նման ձևով կվարվեիք:
– Ես հիմա չեմ ուզում դա մեկնաբանել, կարծում եմ ճիշտ չի լինի: Միգուցե ես նախապես էնպիսի վիճակ ստեղծեի, որ ամեն ոք ուզենար շտաբ չներխուժել: Ես ամեն դեպքում փորձելու եմ արդարացնել ոստիկանության պահվածքը, որովհետև ես ինքս ծանոթ եմ էդ աշխատանքին: Ես ինքս տեսնում եմ, թե նույն ոստիկանությունն ինչպիսի ոչ ճիշտ, անարդար վերաբերմունքի է հաճախ արժանանում: Ոստիկանությունը միշտ էլ ծառայում է առաջինը օրենքին, ինչու չէ, նույն ոստիկանությունը իշխանությունների շահերը պետք է պաշտպանի՞, թե՝ չէ:
– Պարոն Սարգսյան, վերջին ընտրությունների ժամանակ ասվեց, որ Դուք գործուղվում եք Արարատի մարզ՝ Հովիկ Աբրահամյանի ազդեցությունը թուլացնելու, որքանո՞վ Ձեզ հաջողվեց դա և հիմա ի՞նչ իրավիճակ է մարզում:
– Մեր հարաբերությունները շատ նորմալ են, ընդամենը բարևել, ոնց եք, տրամադրությունը ոնց ա, իրար հետ որևիցե թշնամական թեմա չունենք: Մանավանդ, որ ժամանակին մտերիմ ընկերներ ենք եղել, ճանապարհ ենք անցել իրար հետ: Երբևէ մտքովս էլ չի անցել Հովիկ Աբրահամյանի դեմ պայքարի գործին լծվելու: Ես Հովիկ Աբրահամյանին թուլացնելու ոչ կարիք ունեմ, ոչ կարող եմ թուլացնել, ոչ էլ դա իմ տրամաբանության մեջ երբևիցե եղել ա: Ես ինձ բարոյապես կմեղադրեի հաստատ:
– Առաջիկայում սպասվում են Արտաշատի քաղաքապետի ընտրությունները, հայտնի է, որ դրանց պատրաստվում է մասնակցել Հովիկ Աբրահամյանի ազգական և փոխքաղաքապետ Գագիկ Պողոսյանը, նաև ասվում է, որ ՀՀԿ–ն իր թեկնածուն ունի, Գազի Հովոյին հնարավոր է մտցնի խաղի մեջ: Ի վերջո ո՞վ է լինելու ՀՀԿ թեկնածուն:
– Ընդամենը ժողովրդի խոսակցություններն են, որ էսինչն է նախապատրաստվում, կարծում եմ, ենթադրություններ են: Համբերեք ևս մեկ շաբաթ, կիմանաք ով է թեկնածուն: Բայց որ ինձ հետ՝ որպես Արարատի ՀՀԿ կառույցի ղեկավարի, էս պահին նույնիսկ չի էլ քննարկվել, դա փաստ է:
Շարունակությունը` «Փաստ» օրաթերթի այսօրվա համարում
1
2
3
4
5
1
2
3
4
5
2
4
