Բլից-վիրտուալ․ հումորային հարցազրույց նախագահի հետ

«Չորրորդ իշխանություն»-ը վիրտուալ հարցազրույց է վերցրել ՀՀ նախագահ Սերժ Սարգսյանից․

- Պարոն նախագահ, ղարաբաղյան կարգավորման հարցում ի՞նչ զարգացումներ կան։ Վերջերս ավելի ու ավելի հաճախ են խոսում Լավրովի պլանի մասին։

- Անհեթեթ խոսակցություններ են` Լավրովի պլան, Պուտինի կոկաին, Օբամայի հերոին... Հենց որ որեւէ առաջխաղացում լինի` անպայման ինձ տեղյակ կպահեն... ներողություն` ե՛ս ձեզ տեղյակ կպահեմ։

- Տարվա երկրորդ կեսը կարծես թե լավ չսկսվեց` հուլիսին տնտեսական ակտիվությունը 4,3 տոկոսով նվազեց։

- Բա ի՞նչ էիք ուզում, կոռուպցիայի դեմ պայքարում ենք` տնտեսական ակտիվությունը նվազում է։ Եթե ջեբկիրության դեմ պայքարենք` ջեբկիրների եկամուտներն էլ կպակասեն։

- Փաստորեն` շարունակո՞ւմ եք կոռուպցիայի դեմ պայքարել։

- Բա իհարկե, ամեն օր։ Եվ հաճախ ցավոտ հարվածներ եմ հասցնում։ Օրինակ` այսօր առավոտյան սափրվելիս երեսս կտրել եմ։ Հի-հի... կատակ եմ անում։

- Տեսակետ կա, որ տնտեսական ակտիվությունը նվազել է, որովհետեւ Սաշիկը արձակուրդում էր...

- Դոկտոր Սարգսյանի՞ն նկատի ունեք։ Տեսնո՞ւմ եք, ինքներդ էլ եք ընդունում, որ Հայաստանի տնտեսության շարժիչը նա է։

- Բայց ինչո՞ւ դոկտոր, դոկտորակա՞ն է պաշտպանել։

- Չէ, որպես բժիշկ եմ ասում։ Հայաստանում ոչ մի բժիշկ նրա չափ մարդկային կյանքեր չի փրկել։ ԳԱԻ պետն էլ ասեց, չէ՞, որ այս տարի արագաչափերի շնորհիվ ճանապարհատրանսպորտային պատահարների զոհերի թիվը 50-ով նվազել է։ Իսկ մեր ապերախտ հասարակությունը նրան որպես ազգի փրկիչ ընդունելու փոխարեն անեկդոտներ է հորինում...

- Լավ, անցնենք ներքաղաքական խնդիրներին։ Դուք ակնարկեցիք, որ «Սասնա ծռեր» խմբավորումը, հնարավոր է, օտարերկրյա մութ ուժերի նպատակներին է ծառայում...

- Այո, եւ ես բոլոր հիմքերն ունեմ դրա համար։ ԱԱԾ-ին հանձնարարել էի, ու նրանք մանրամասն հետազոտել են «Սասնա ծռեր» խմբավորման անվանումը եւ պարզել, որ քանի որ Սասունը գտնվում է Թուրքիայի տարածքում...

- Լավ, լավ։ Ինչպե՞ս կարողացաք այնպես անել, որ լեհական ընկերությունը հրաժարվեց նույնականացման քարտեր պատրաստելուց։ Չէ՞ որ նորմալ, շահույթ հետապնդող կազմակերպություն է։

- Հի-հի... Շահույթ հետապնդող կազմակերպություն է, դրա համար էլ հրաժարվեց։ Եթե, օրինակ, տաքսու վարորդին երկու տարբերակ առաջարկես` կամ հազար դրամ եմ տալիս, ինձ տար Չարբախ, կամ 2 հազար եմ տալիս` ասա «գազս պրծել ա», ո՞ր տարբերակը կընտրի։

- Ուզում եք ասել...

- Ես ոչ մի բան էլ չեմ ուզում ասել, մեր համար ասում-խոսում ենք...

- Լավ, շնորհակալություն ասել-խոսելու համար։