Ինչո՞ւ Երևանում Տիմատին չերգեց․ պարզաբանում է երգիչն ու համերգի կազմակերպիչները․ տեսանյութ

Մարզահամերգային համալիրում երեկ տեղի ունեցած համերգի շրջանակներում պետք է ելույթ ունենար նաեւ հայտնի երգիչ Տիմատին, ով, սակայն, չնայած հանդիսատեսի սպասումներին, այդպես էլ բեմ չբարձրացավ։

Համերգի ընթացքում հայտարարվեց, որ Տիմատիի ելույթը տեխնիկական պատճառներով չեղյալ է հայտարարվել: Սակայն, մեր տեղեկությունների համաձայն՝ ռուս հայտնի երգիչը բեմ չի բարձրացել կազմակերպիչ Jet Set ընկերության հետ ունեցած տարաձայնությունների պատճառով: Մինչդեռ կազմակերպիչ ընկերությունից այլ պատճառ են նշում։

«Առաջին շարքում կանգնած ֆանատները ջուր էին լցնում տեխնիկայի վրա, որի հետեւանքով սաունդքարտը վառվել է, դա տեղի է ունեցել հենց Տիմատիի բեմ դուրս գալուց առաջ,-արդեն այսօր armtimes.com-ի հետ զրույցում ասաց համերգի կազմակերպիչ Jet Set ընկերության հասարակայնության հետ կապերի բաժնի աշխատակիցը՝ հավելելով, որ տեխնիկան արտիստներն իրենց հետ Ռուսաստանից էին բերել եւ այն տեղում սարքելը կամ նույնը գտնելը պարզապես հնարավոր չի եղել,-Կազմակերպիչները համերգի ընթացքում հայտարարել են, որ Տիմատին հենց իր առաջին ազատ օրը կգա ու առանձին ելույթ կունենա, պարզապես մարդիկ պետք է պահեն իրենց այս համերգի տոմսերն ու առաջիկայում հին տոմսերով մասնակցեն համերգին»։

Թե մոտավորապես երբ կլինի այդ համերգը, կազմակերպիչները դժվարանում են ասել։ Կազմակերպիչները նաեւ բացառում են տեխնիկան միտումնավոր փչացնելու վարկածը։

Համերգին երգել են Քրիստինա Ս-ին, L'One-ը եւ Մոտը: Մարզահամերգային համալիրի համերգասրահը լեփ լեցուն է եղել:

Տիմատիի երգարվեստի սիրահարներից Լենան armtimes.com-ին ասաց՝ թեեւ ցավում է, որ սիրելի երգչին այդպես էլ չեն տեսել, սակայն գոհ է համերգից․

«Ճիշտ է, համերգին Տիմատին չերգեց, սակայն համերգը շատ լավ անցավ, միակ թերությունը դա էր ու կարծում եմ ինքը, ինչպես խոստացան, անպայման, կգա կերգի ու մենք էլ կգնանք»։

Հայտնի երգիչը կատարված միջադեպի առնչությամբ տեսաուղերձ է հղել, որում ներողություն է խնդրել ու նույնպես նշել է, որ բեմ չի բարձրացել տեխնիկական խնդիրների հետեւանքով։

Երգիչը վստահեցրել է, որ համերգն անպայման տեղի կունենա եւ առաջիկայում կտեղեկացնեն ամսաթվի մասին։ Նա տեսանյութ է հրապարակել ինստագրամի իր էջում:

 

Публикация от Black Star (@timatiofficial) Май 12 2017 в 1:54 PDT