Ալիեւը Հայաստանի հետ կապված՝ կոչով դիմել է իսլամական աշխարհին

Ադրբեջանի նախագահ Իլհամ Ալիեւի հերթական հոդվածն է հրապարակվել: Այս անգամ Իսլամական համագործակցության կազմակերպության պաշտոնական տպագիր ամսագրում՝Journal-ում: Հոդվածը վերնագրված է՝ «Իսլամական համերաշխության ամրապնդումը՝ ժամանակի պահանջ:

Ալիեւն այդ հոդվածում անդրադարձել է նաեւ Հայաստանին՝ նշելով, որ իսլամական աշխարհն այժմ լուրջ մարտահրավերների առաջ է կանգնած եւ դրանցից մեկը հայ-ադրբեջանական հակամարտությունն է: Ադրբեջանի նախագահը գրել է, թե հայտնի է՝ հայերը վերջին 200 տարում արյունոտ քայլերի են գնացել՝ Ադրբեջանի հողերին տիրանալու եւ այդ հողերի վրա հայկական պետականություն ստեղծելու ծրագրերն իրականացնելու նպատակով:

«Ներկա հայկական պետականությունը եւս ստեղծվել է Ադրբեջանի բնօրրանը համարվող հողերի վրա»,- գրել է Ալիեւը ու հոդվածը շարունակել ադրբեջանական քարոզչության ամենակրկնվող նախադասությամբ, թե Հայաստանը շարունակել է ագրեսիվ քաղաքականությունն ու 90-ականների սկզբին օկուպացրել Ադրբեջանի տարածքի 20 տոկոսը: Ապա հետեւել են քարոզչական մյուս բոլոր թեզերը՝ ըստ հերթականության՝ 1 միլիոն ադրբեջանցի փախստականների, էթնիկ զտումների, ՄԱԿ-ի անվտանգության խորհրդի 4 բանաձեւերի մասին:

Ալիեւը նշել է, որ Իսլամական համագործակցության կազմակերպությունը մի քանի բանաձեւերով հայտարարել է, որ հարգում է Ադրբեջանի տարածքային ամբողջականությունը եւ պաշտպանում է Ադրբեջանի դիրքորոշումները: Ադրբեջանի նախագահը համոզմունք է հայտնել, որ այդ բանաձեւերը պետք է ազդակ լինեն բոլոր այն մուսուլմանական երկրների համար, որոնք պատրասվում են Հայաստանի հետ հարաբերություններ զարգացնել, որովհետեւ Հայաստանը վտանգավոր է ոչ միայն Ադրբեջանի կրոնական եւ մշակութային արժեքների, այլ ընդհանրապես Իսլամի պատմամշակութային ժառանգության համար: