Ղարաբաղի հարցում Ամերիկան փոփոխության է պատրաստվում

Հարցազրույց տալով «Ամերիկայի ձայն» ռադիոկայանին՝ ԵԱՀԿ Մինսկի խմբի ամերիկացի նոր համանախագահ Ռիչարդ Հոգլանդը ասել է, թե համաձայն է, որ կա գործընթացում ԱՄՆ աշխուժության անհրաժեշտություն: «Համաձայն եմ, որ մեզ անհրաժեշտ է փոքր-ինչ ավելի ակտիվ լինել, սակայն մենք ԱՄՆ-ի նոր վարչակազմի ամենավաղ շրջանում ենք: Այս նոր վարչակազմը դեռևս նոր է մշակում իր արտաքին քաղաքական մոտեցումները և թիմը, այնպես որ, եկեք լինենք փոքր-ինչ համբերատար և տեսնենք, թե մոտ ամիսների ընթացքում այս ամենն ինչպես է զարգանում»,- հայտարարել է ամերիկացի համանախագահը:

Նա մի քանի ամիս առաջ է այդ կարգավիճակում փոխարինել Ջեյմս Ուորլիքին: Ուորլիքը բավական աշխույժ համանախագահ էր թե այցերի, թե սոցցանցերում գրառումների իմաստով, որոնց միջոցով նա տարբեր կարգի ազդակներ ու հաղորդագրություններ էր հայտնում կարգավորման գործընթացի տրամաբանության մասով՝ հաճախ բավական նրբորեն հանրության համար ներկայացնելով նաև անցանկալի օրակարգի ռիսկեր: Ուորլիքը այդպիսով հիմնականում ազդակներ էր հայտնում Հայաստանի հասարակությանը՝ հաճախ նույնիսկ ասելով բաներ, որոնք առաջացնում էին Հայաստանի հասարակական դժգոհ արձագանքը և կոշտ գնահատականները նրա նկատմամբ: Այդ պատճառով էլ ադրբեջանցիները հաճախ էին դժգոհում նրա գործունեության հայամետությունից:

շարունակությունն՝ այստեղ