«Կյանքը այս օրերին նոր իմաստ է ստացել». Մավր Մկրտչյանը՝ կրկին հայր դառնալու մասին

Երգիչ Մավր Մկրտչյանը դստեր ծնունդից հետո ապրած երջանկությունն ու հուզմունքը դեռ դժվարանում է բառերով ձևակերպել։

«Զգացողություններս աննկարագրելի են, դրա համար երևի չեմ փորձի նկարագրել», -Tert.am Life-ի հետ զրույցում անկեղծացավ երգիչը:

Նրա խոսքով՝ ընտանիքը փոքրիկին շատ է սպասել։ «Կասեի երկար՝ մոտ յոթ տարի։ Եվ ուզում եմ հատուկ շնորհակալությունս հայտնել մի հրաշալի մարդու և բժշկի՝ Անդրանիկ Պողոսյանին։ Նրա շնորհիվ այսքան տարի հետո ունեցանք առողջ բալիկ»,- պատմեց Մավր Մկրտչյանը: 

Անվան ընտրության հարցում, ինչպես հաճախ պատահում է, տանն իսկական «մարտեր» են եղել։ Բայց ոչ թե մայրիկի ու հայրիկի միջև․ «Որդիս որոշեց, որ ինքը պետք է ընտրի։ Իմ սրտին մոտ էր Սոսե անունը, կնոջս՝ Մանեն։ Եվ հաղթեց Մոնթեն՝ որդիս։ Աղջկաս անունը դրեցինք Մանե»,-մեզ հետ զրույցում նշեց երգիչը: 

Մոնթեն ու Մանեն 7 տարի տարիքային տարբերությամբ են ծնվել, բայց արդեն անբաժան են։ Մավրը պատմում է՝ տղան առավոտից մինչ ուշ գիշեր նստում է քրոջ օրորոցի մոտ, հսկում է, սիրում է, և այդ կապը անսահման ջերմ է․
«Սա ծնողի համար ամենամեծ երջանկությունն է։ Ու նաև՝ աղջկաս համար, որ Աստված նման եղբայր է պարգևել իրեն»։

Իսկ Մավրի համար կյանքը հենց այս օրերին նոր իմաստ է ստացել․ «Կյանքը սկսեցի ավելի սիրել։ Վերջին շրջանում կյանքը դարձել էր ավելի շատ հիասթափությունների ու պայքարի դաշտ, քան ապրելու ու արարելու։ Բայց հիմա վստահ եմ՝ ծնվել է մի հայուհի, ով իր կյանքով բարիք է բերելու իր ընտանիքին ու հայրենիքին»,- ամփոփեց երգիչը: