Գեներալի տղան բանավեճի է հրավիրել ընդդիմադիր «պաչկին»

Hraparak.am-ը գրում է․

Գեներալ Մանվել Գրիգորյանի որդի, Էջմիածնի քաղաքապետ Կարեն Գրիգորյանը «նախընտրական» գրառում է կատարել իր ֆեյսբուքյան էջում եւ առաջիկա ՏԻՄ ընտրություններում իր մրցակից Արթուր Թումանյանին բանավեճի առաջարկ է արել: «Էջմիածնի քաղաքապետի «այլընտրանքային» թեկնածու ներկայացող պաչկին` Թումանյան Արթուր, Աբգարյան Հրաչ, Զնդո, Ճոյտ, հրավիրեցի քաղաքակիրթ բանավեճի, սակայն այդպես էլ արձագանք չեղավ: Հիմա խոսքս ուղղում եմ կոնկրետ թեկնածուին` Արթուր Թումանյանին` ակնկալելով իր խոհեմությունը, հայրենասիրությունը, քաղաքի նկատմամբ սերն ու հարգանքը: Եկ որեւէ ձեւաչափով բանավիճենք` կա՛մ մամուլի ակումբում, կա՛մ հեռուստաընկերությամբ, կա՛մ էջմիածնեցիների ներկայությամբ: Ես ներկայացնեմ իմ պատկերացրած Էջմիածնի տեսլականը: Դու էլ ներկայացրու, թե ինչու ես կամենում քաղաքապետ դառնալ, ի՞նչ ծրագրեր ես կյանքի կոչելու եւ ի՞նչ մեխանիզմով: Ես յուրաքանչյուր էջմիածնեցու կարծիքն էլ հաշվի եմ առնում, յուրաքանչյուր էջմիածնեցուց, այդ թվում`քեզանից, պատրաստ եմ լսել առաջարկներ: Դու ինձ լավ ես ճանաչում, ես ոչ միայն իմ օգտին քվեարկողների քաղաքապետն եմ. ես հավասար եմ վերաբերվում բոլորին եւ քեզ էլ վերաբերվելու եմ որպես էջմիածնեցու, որն առաջարկներ անելու, կարծիք հայտնելու իրավունք ունի»,-արհամարհական տոնով գրել է քաղաքապետը:

Մենք կապվեցինք Արթուր Թումանյանի հետ՝ պարզելու, թե տեղյա՞կ է Գրիգորյանի գրառման մասին եւ արդյոք ընդունո՞ւմ է իրեն արված առաջարկը: «Տեղյակ եմ, վաղը կլսեք այդ առթիվ իմ հայտարարությունը, ինչ որ պետք է, ես կասեմ այդ մասին»,-ասաց նա՝ հավելելով, թե կարեւոր գործերով է զբաղված: Նշենք, որ Թումանյանն ավելի վաղ հայտարարել էր, թե Էջմիածնում վախի մթնոլորտ է, հարցերը տարիներ շարունակ լուծվել են ծեծուջարդի միջոցով։ Միաժամանակ համոզմունք էր հայտնել, որ ինքն ու իր աջակիցները հաղթելու են ընտրություններում: Աստված չանի՝ մեկը շփոթվի ու կտրի գեներալի մեքենայի դեմը կամ մեքենան կանգնեցնի գեներալի արգելած վայրերում, որտեղ միայն Գրիգորյանների եւ նրանց ուղեկցողների մեքենաներն իրավունք ունեն կայանել։

Օպերատիվ կերպով «խամ» վարորդին կմոտենան Մանվելի մարդիկ ու կհորդորեն մեքենայի իզնութոզն արագ կորցնել, քանի դեռ մեքենայից չի զրկվել, կամ մեքենայի անվադողերը չեն ծակել: «Էջմիածնում անգամ ծտերն էդ տարածքում քուջուջ անելու համար պիտի ունենան քաղաքապետի ու նրա գերդաստանի թույլտվությունը»,- ասում են քաղաքի բնակիչները: Գեներալի շրջապատի մարդիկ էլ ասում են, որ նա բնավորությամբ ահավոր անհամբեր է, ինչը դրսեւորվում է հատկապես մեքենայով երթեւեկելիս: «Ձեռքը որ ճար լինի՝ կարմիր լույսի տակով էլ քշել կտա: Պատկերացրեք՝ ի՜նչ է տեղի ունենում նրա ներաշխարհում, եթե հանկարծ հայտնվում է խցանման մեջ: Էլ չասած՝ եթե մեկը, Աստված չանի, հանկարծ շփոթվի ու կտրի գեներալի մեքենայի դեմը…. մինչեւ յոթ պորտ «կօրհնվի» նրա կողմից»,-ասաց մեր աղբյուրը: