20-ամյա աղջիկն իր եղբայրներին սուտ մեղադրել է իրեն բռնաբարելու մեջ

Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է Գյոզալ Բ.-ի (անունը փոխված է) գործի դատական քննությունը:

20-ամյա Գյոզալ Բ.-ն Արագածոտնի մարզի բնակչուհի է, ամուսնացած չէ, խնամքին ոչ ոք չունի:

Նրան մեղադրանք էր առաջադրված սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին և 2-րդ կետերով:

Ըստ դատական ակտի՝ գործի քննությամբ հաստատված է համարվել հետևյալը:

Գյոզալ Բ.-ն իր ընտանիքի հետ բնակվել է Արագածոտնի մարզում: Աղջիկն իր հոր ու քրոջ հետ վերջին 2-3 տարում աշխատել է Արմավիրի մարզի անասնաֆերմաներից մեկում: Ֆերման պատկանում էր երկու եղբայրների: Գյոզալի հայրը անասնապահ էր այդ ֆերմայում, իսկ Գյոզալն ու քույրը՝ կթվորուհիներ:

Աշխատելու ժամանակահատվածում Գյոզալն ու քույրը բնակվել են իրենց գործատուների տանը:

Ժամանակի ընթացքում Գյոզալի ու գործատու եղբայրներից մեկի որդու միջև սիրային կապ է հաստատվել: Նրանք համացանցի սոցիալական կայքերի միջոցով գաղտնի սիրային նամակագրություն են վարել, բացի այդ, պարբերաբար էլ սեռական հարաբերություն են ունեցել իրար հետ:

Երիտասարդի հորեղբայրը, սակայն, պատահաբար տեղեկացել է այդ գաղտնի սիրային կապի մասին:

Նա առանձնապես լավ կարծիքի չէր Գյոզալի վարքի մասին, այդ պատճառով չի ցանկացել, որ եղբորորդին կապ ունենա այդ աղջկա հետ: Նա արգելել է երիտասարդների շփումը, տեղեկացրել է նաև եղբորը՝ տղայի հորը:

Վերջինս նույնպես կտրականապես արգելել է որդուն՝ շարունակել կապը և նույնիսկ շփվել Գյոզալի հետ: Տղան չի ընդդիմացել…

Արդյունքում, ըստ դատական ակտի, Գյոզալը «քեն» է պահել իր երջանկությունը խափանած եղբայրների նկատմամբ ու որոշել է… վրեժ լուծել նրանցից:

Գիտակցելով, որ իր տրամադրած տեղեկատվությունը կեղծ է, զգուշացված լինելով սուտ մատնություն կատարելու համար նախատեսված քրեական պատասխանատվության մասին՝ Գյոզալ Բ.-ն 2016 թվականի փետրվարի ամենավերջին օրը՝ 29-ին, ոստիկանությունում հաղորդում է տվել այն մասին, թե 2015 թվականի դեկտեմբերին գործատուն՝ սիրած տղայի հորեղբայրը, տանը բռնություն է գործադրել իր նկատմամբ ու բռնի սեռական հարաբերություն է ունեցել իր հետ, իսկ մյուս գործատուն՝ տղայի հայրը, 2016 թվականի փետրվարին է ոտնձգել իր սեռական անձեռնմխելիության նկատմամբ, բայց այս անգամ ինքը ուժ է գործադրել ու ազատվել է, չի թողել, որ բռնաբարությունը տեղի ունենա:

Այս հաղորդման հիման վրա քրեական գործ է հարուցվել, որի նախաքննության ժամանակ Գյոզալ Բ.-ն, մեղադրանքի արհեստական ապացույցներ ստեղծելով, ներկայացրել է պատռված շապիկ ու զգեստ՝ ասելով, թե դրանք վնասվել են, երբ տղայի հորեղբայրը բռնաբարում էր իրեն:

Գյոզալի սուտը բռնվել է, գործի քննությամբ նրա հաղորդումը չի հաստատվել, նա խոստովանել է, որ սուտ հաղորդում է տվել՝ իր նախկին գործատուներին մեղադրելով ծանր հանցագործության համար, ինչը զուգորդել է մեղադրանքի արհեստական ապացույցներ ստեղծելով:

Ընդհանուր իրավասության դատարանում Գյոզալ Բ.-ն ընդունել է մեղքը, զղջացել է կատարածի համար, նրա միջնորդությամբ գործը քննվել է արագացված ընթացակարգով:

Դատարանը հաշվի է առել, որ Գյոզալ Բ.-ն նախկինում դատված չի եղել: Նա բնութագրվել է… բացասական…

Տուժող եղբայրները չեն բողոքել նրա դեմ, քաղաքացիական հայցի պահանջ առաջ չեն քաշել:

Գյոզալ Բ.-ն մեղավոր է ճանաչվել ՀՀ քրեական օրենսգրքի 333 հոդվածի 2-րդ մասի 1-ին և 2-րդ կետերով, դատապարտվել է 2 տարի ազատազրկման: Նրա նկատմամբ պայմանական դատապարտություն է կիրառվել, ու սահմանվել է 2 տարի փորձաշրջան:

Դատավճիռը չի բողոքարկվել և օրինական ուժ է ստացել:

Նյութն՝ «Առաջինի»