«Ազիզյաններ» սիթքոմն արդեն տեւական ժամանակ է հեռուստաէկրաններին է: Այն հասցրել է սիրվել ու սիրելի դարձնել երիտասարդ դերասանների, որոնց հեռուստադիտողն առաջին անգամ տեսավ հենց այս սիթքոմի շրջանակում:
20-ամյա Մարի Պետրոսյանը, ով մարմնավորում է Ազիզյանների ընտանիքի դստերը, Life.panorama.am-ին պատմեց, որ այժմ, ասես, իր երազում ապրի.
«Ես ավարտել եմ «Աբել Աբելյանի քասթինք սքուլը», եւ հենց այստեղից էլ նախորդ տարի ինձ հրավիրեցին մասնակցելու «Ազիզյանների» ընտանիքի դստեր կերպարի քասթինգին: Չեմ թաքցնի՝ առաջին փորձը լավ չստացվեց, բայց դա, ի ուրախություն ինձ, պատճառ չդարձավ, որ հաջորդ անգամ եւս ինձ կանչեն: Այդպիսով՝ եւս երկու, երեք անգամ մասնակցեցի քասթինգին, եւ մի օր էլ, ի ուրախություն ինձ, զանգ ստացա՝ ինձ հայտնեցին, որ հենց ինձ են ընտրել: Այս պահին ապրումներս չեմ կարողանա նկարագրել: Ես երբեք չէի պատկերացնի, որ իմ առաջին քայլերն այս ոլորտում կանեմ «Կարգին ստուդիայի» հետ՝ ի դեմս Հայկ ու Արման Մարությունների: Հիմա ասես այս ամենը երազ լինի, մի քանի ամիս է, ինչ իմ երազում եմ ապրում»,- պատմեց երիտասարդ դերասանուհին:
Խոսելով «Ազիզյաններում» դերասանների հետ համատեղ աշխատանքի մասին՝ Մարին նշեց.
«Մեզ մոտ, առանց չափազանցության, ընտանեկան մթնոլորտ է տիրում, այստեղ գալիս ենք ոչ թե աշխատելու, այլ՝ հանգստանալու: Գիտեք, հնարավոր է, որ դերասանն իր ուժերի վրա վստահ լինի, սակայն կան մարդիկ, որոնք նրան կարող են եւ բարձրացնել, եւ իջեցնել: Թե Հայկ Մարությանը, թե Արման Մարությանը վստահեցին ու հավատացին ինձ, որը փոխանցեցին նաեւ ինձ: Շատ դժվար է առանց փորձ ունենալու հայտնվել պահանջկոտ ու մեծ հաջողություն գրանցած մասնագետների մոտ, այն էլ՝ գլխավոր կերպարով, բայց ինձ մոտ, կարծես թե հաջողվեց դա: Ինձ համար մեծ պատիվ է խաղալ Հայկ Մարությանի հետ ու դառնալ նրա ընկերը: Ինչ վերաբերվում է մյուս դերասաններին, գրեթե բոլորն էլ թատրոնի դերասաններ են՝ մեծ փորձով ու մասնագիտական գիտելիքներով: Իմ կերպարային գիծն ավելի շատ զարգանում է Ազիզյանների ընտանիքի երեխաների, այսինքն՝ իմ հերոսուհու եղբայրների հետ: Բորիս Բաղդասարովի հետ նախկինում ծանոթ էի «Աբել Աբելյանի քասթինք սքուլից»: Մենք շատ լավ ընկերներ ենք, ինչն էլ ինձ շատ է օգնում նաեւ նկարահանման հրապարակում: Արման Մարությանի խոսքով՝ երեխաներն այս նախագծի ուժեղ օղակ են»:
Թե որքանո՞վ են «Ազիզյանների» գլամուրային Մարին նման իրական Մարի Պետրոսյանին, դերասանուհին պատասխանեց.
«Իմ հերոսուհին տարբերվում է այժմյան ստանդարտ գլամուրային աղջիկներից, նա ունի նաեւ այլ հետաքրքրություններ: Մենք միմյանց որոշ նմանություններ ունենք, իհարկե, բայց միեւնույն է, սիթքոմում ես իրական Մարիին չեմ խաղում»:
Հետաքրքրվելով, թե Մարի Պետրոսյանը դերասանական արվեստից զատ ի՞նչ հետաքրքրություններ ունի, պատմեց.
«Յոթ տարի հաճախել եմ Լատինոամերիկյան պրոֆեսիոնալ պարի, սակայն հետո որոշ խնդիրների պատճառով թողեցի այն, ինչն իմ ամենացավոտ կողմն է: Հիմա սիրողական մակարդակով կրկին պարում եմ: Ինձ շատ է հետաքրքրում նաեւ նկարչությունն ու կավագործությունը: Երազում եմ նաեւ ոստիկան դառնալու մասին, որին ծնողներս այնքան էլ կողմ չեն: Չգիտեմ, գուցեեւ ապագայում այդ երազանքս էլ կատարվի, ի վերջո ասում են՝ երազանքները հետաքրքիր պատահականությամբ կատարվում են»:
Մարի Պետրոսյանի առաջիկա ծրագրերում է նաեւ ընդունվել Երեւանի թատրոնի եւ կինոյի պետական ինստիտուտ, որպեսզի սիրելի աշխատանքում ավելի շատ հմտություններ ու գիտելիքներ ձեռք բերի:
«Քասթինգ սքուլի ավարտական ներկայացման շրջանակում պատիվ եմ ունեցել բեմ դուրս գալու, եւ պետք է ասեմ, որ դա ինձ շատ դուր եկավ: Հուսամ՝ ապագայում, երբ գիտելիքներս առավել լայնածավալ լինի, կհայտնվեմ նաեւ թատրոնում»,- հավելեց նա:
Երիասարդ դերասանուհու համար երազանք է խաղալ Աբել Աբելյանի հետ.
«Աբելին շատ եմ սիրում, նրանից շատ բան եմ սովորել ու երազանք է նրա հետ խաղալը: Նա ոչ միայն հիանալի մասնագետ է, այլեւ լավ մարդ»,- նկատեց նա:
Իսկ վերջում, հարցին, թե հայտնիությունը երիտասարդ դերասանուհու կյանքը փոխե՞լ է արդյոք նշեց.
«Հայտնիությունը դերասանի համար շատ հաճելի է: Այսօր ինձ կարող են փողոցում կանգնեցնել, հատկապես երեխաները լուսանկարվեն ինձ հետ: Այդ ժամանակ հիշում եմ ինձ, երբ փոքր ժամանակ ինքս էլ երկրպագում էի տարբեր դերասանների ու երջանկություն էր նրանց հետ լուսանկարվելը, խոսելը: Պետք է շեշտեմ, որ հայտնիությունը ինձ չի փոխել, հաստատ աստղային հիվանդությամբ չեմ տառապում, գուցե մարդիկ կան, որ մտածում են, թե ես գոռոզացել եմ, ինչն այդպես չէ, եւ սա շատ հաստատակամ եմ ասում»:
1
2
3
4
5
1
2
4
5
1
3
4
